domenica 17 giugno 2012

SIF - informazions pai emigrants che a tornin : gnove trasmission su RADIO ONDE FURLANE!






SIF


informazions

pai emigrants che a tornin


Un progjet de

Clape Friûl dal Mont,



une trasmission

su Onde Furlane




A tacâ di martars ai 19 di Jugn, si pues scoltâ “SIF in Onde” ogni cuindis dîs il martars a 11 a matine e in repliche il miercus a la une dopo di misdì in modulazion di frecuence (sui 90, sui 90.200 e sui 106.500 Mhz in Friûl) e in rêt par dut il mont, ae direzion www.ondefurlane.eu , là che  la programazion di Onde Furlane e ven trasmetude in direte su cuatri  canâi diferents che a van daûr dai divers fûs oraris di Europe, Canada, Argjentine e Australie.



LEI DUT



La informazion pai emigrants che a tornin il Friûl e je la protagoniste di un progjet de Clape Friûl dal Mont e di une trasmission su Radio Onde Furlane.

Il progjet si clame “SIF – Sportel Informe Furlans” e al salte fûr par iniziative de Clape Friûl dal Mont, associazion di promozion sociâl che e je stade metude adun par tignî dongje i emigrants tornâts in Patrie dopo jessi stâts tal forest – i “furlans dal mont” – e cun chê di valorizâ la lôr esperience di lavôr e di vite a pro di dute la comunitât furlane.

La “Clape” lu à inviât za timp indaûr e cumò e à tornât a metilu in vore cul jutori dal Servizi Volontariât, associazionisim, rapuarts cui migrants e politichis pai zovins de Regjon, daûr de Leç regjonâl 30 dal 2007, articul 4, come 35.

«Cheste iniziative – al sclarìs Gianpaolo Della Schiava, president de Clape Friûl dal Mont – e je nassude daûr de esperience direte di tancj emigrants che a son tornâts in Patrie. L'intindiment al è chel di judâ cui che al torne, stant che dopo agns e agns tal forest, tornâ in Friûl al è une sorte di gnove migrazion. Chest a al vûl dî, tra lis altris, vê a ce fâ ancje cun diviers problemis, che a son di caratar burocratic, tra citadinance, pensions, tassazions e titui di studi, ma che a tocjin ancje la dimension sociâl e il prin moment dal inseriment pratic te societât furlane di vuê di chei che o clamìn “furlans dal mont” e des lôr fameis».

Della Schiava al fâs un esempli: «la Leç regjonâl su la emigrazion (la L.R. 7 dal 2002) e previôt ancje intevents di assistence pai rimpatriâts, ma al sucêt avonde dispès che tancj di lôr no lu san: no dome chei che a son i destinataris di chescj jutoris ma ancje i Comuns, che inte plui part dai câs a son i sogjets che a àn di metiju in vore. Cul “SIF” o cirìn di pandi ator chestis informazions, a pro di ducj chei che ur coventin».

Il progjet al va indenant sei cul contat diret tra la persone singule e la “Clape” (in rêt: www.clape.it ; telefon: 347.4483819; e-mail: info@clape.it e sif@clape.it ), che le compagne par cjatâ soluzion aes sôs dibisugnis specifichis, sei cu la difusion di informazions di servizi che a tocjin lis diviersis cuistions peadis cul tornâ in Friûl.

Al è propit achì che e jentre la radio, cu la trasmission “SIF in Onde. Informazions pai emigrants che a tornin in Friûl”, che e fâs part ad in plen dal progjet “SIF”.

Il program, che al è curât e condusût di Marco Stolfo, al da fûr informazions inzornadis su diviers argoments che a tocjin i emigrants che a tornin in Patrie, cun profondiments specifics, fats cun esperts dal setôr, su cuistions tant che chês des pensions, de assistence sociâl, de cjase, de fiscalitât, tra tassazion taliane e tassazion dai Paîs di emigrazion, dal sparagn e des pratichis automobilistichis.

In “SIF in Onde” si cjale al mont de emigrazion a 360 grâts, cun altris gnovis dal Friûl “in Friûl” e di chel “dal” Mont e “pal” Mont e cun selezions musicâls di pueste, a tacâ de emigrazion cjantade e contade dai soliscj e dai grups de musiche furlane, plui o mancul “gnove” e “fuarte”, fintremai aes produzions dai musiciscj di divignince furlane che a son tal forest.

Il dut si insuaze te atenzion che, sei te sô ativitât gjenerâl che cun progjets di pueste tant che “ Friûl in Rêt” o “SgarfeFurlans”, Onde Furlane e à simpri mantignût viers dai furlans “pal mont” e “dal mont”.

A tacâ di martars ai 19 di Jugn, si pues scoltâ “SIF in Onde” ogni cuindis dîs il martars a 11 a matine e in repliche il miercus a la une dopo di misdì in modulazion di frecuence (sui 90, sui 90.200 e sui 106.500 Mhz in Friûl) e in rêt par dut il mont, ae direzion www.ondefurlane.eu, là che  la programazion di Onde Furlane e ven trasmetude in direte su cuarti  canâi diferents che a van daûr dai divers fûs oraris di Europe, Canada, Argjentine e Australie.

------------------

Nessun commento:

Posta un commento