LENGHE FURLANE
Mostre dal Cine
III edizion
20 – 23 Novembar
20 – 23 Novembar
Lis proiezions si fasaran li dal cine VISIONARIO
in vie Asquini, 33 a Udin.
I films presentâts a son in version origjinâl
cui sottitui par inglês e par furlan.
I films in lenghe sarde a son sottitulâts par talian.
I films in lenghe sarde a son sottitulâts par talian.
Jentrade libare.
Cundut di une basse disponibilitât finanziarie, o sin rivâts compagn a meti adun cheste tierce edizion de Mostre dal Cine. Cun fature ma cu la convinzion che la manifestazion e leve fate in ogni mût.
Intune situazion economiche miôr di chê che o sin daûr a vivi, cuntun pôc plui di finanziament o saressin di sigûr rivâts adore a ufrî alc di plui, cualchi sezion in plui, cualchi event particolâr che o vevin pensât. Ma, l’essenziâl al reste: chel di mostrâ un slambri significatîf de produzion cinematografiche intes lenghis “minoritariis” europeanis.
La prime serade dal festival o vin volût dedicale al film furlan Vivi achì di Paolo Comuzzi e ae produzion cinematografiche de Sardegne. Une ocasion di no pierdi par presentâ, Su Re, la ultime opare di Giovanni Columbu, regjist che di lui o vevin za vût ocasion intai agns passâts di mostrâ i lavôrs precedents in lenghe sarde tant che Arcipelaghi, Visos o Andelas. Simone Contu un regjist che i spetatôrs de Mostre a àn vût ocasion di cognossi inte edizion precedente, nus presente la seconde part di Treulababbu (Su molenti de Oramala). O varìn ancje la ocasion di cognossi i lavôrs di altris doi autôrs de Sardegne: Torre Cubeddu e Daniele Atzeni.
Il cine, se no di lote ma di sigûr di denuncie al è chel che nus ven de Catalogne cun Velocitat, un documentari di Ivó Vinuesa su chel trat di TAV che al varès di colegâ Barcelone cun Parîs ma che i abitants a calcolin in maniere negative stant al impat che cheste linie e varès sul ambient.
Fènix 11*23 di Joel Joan e Sergi Lara al è invezit un cine di finzion ma che al conte une storie vere, dut intun sureâl e ridicule se no ves un aspiet dramatic. La storie e je che di un frutat di 14 agns, Èric Bertran, che ispirât di un romanç di Harry Potter al met adun un sît in rêt pe difese de lenghe catalane. Une sô e-mail, indreçade a di un supermarcjât e li che si domandave di presentâ i prodots in vendite ancje par catalan, e fâs scatâ il dispositîf poliziesc dal antiterorisim. Ma la storie no si ferme li, parcè che il fantacin al varà di subî un procès in plene regule cul risi di une condane a vot agns di riformatori. Il fat al è emblematic de pression psicologjiche, de repression politiche e de violence che il podê al dopre intai confronts di dut ce che, daûr dal sô pensâ, al rapresente un element di fastidi.
Un altri documentari che al jentre ad in plen in cheste categorie, al è il film basc Barrura Begiratzeko Leihoak (Ventanas al interior) [Barcons sul didentri] metût adun di cinc regjiscj. Il film al fronte il teme dramatic dai presonîrs politics di ETA. Cinc regjiscj che a fevelin di cinc câs diferents: une zovine in spiete di vignî arestade, un om che al torne ae societât dopo disesiet agns di preson, une mari che e à regjistrât dutis lis conversazion telefonichis cu la fie che e je dentri, la storie di un inteletuâl e chê di un ex leader de ETA che dopo de preson al torne a viodi un so amì di frut, deventât cumò regjist.
Pe comedie, la manifestazion e à volût programâ un noir firmât di Telmo Esnal (viôt a chest proposit articul e interviste in Segnâi di lûs) intitulât Urte berri on, amona! [Bon an, none!]. Esnal, che o vin cognossût ae prime edizion de Mostre e che di lui o cognossìn luncs e curtmetraçs, in cheste edizion al sarà presint ancje cul curt Hamaiketakoa.
La tradizion dai curts intal Paîs Basc e je un fat consolidât, par la cuâl, ancje achì no podeve mancjâ une selezion dai ultins curtmetraçs distribuîts di Kimuak, un progjet de cineteche basche.
Vilamor di Ignacio Vilar, un altri regjist presint inte prime edizion e che di lui o vevin presentât Pradolongo, al rapresente in cheste edizion la Galizie.
A rapresentâ l’audiovisîf furlan a saran Marco D’Agostini cul so documentari JNK – Oltri la ultime frontiere; Paolo Comuzzi cul documentari di art Vivi achì (che al sarà presentât inte prime zornade dal festival) i zovins Marco Londero e Giulio Venier, regjiscj di Visins di cjase, e i doi autôrs de serie Felici ma Furlans, Tommaso Pecile e Alessandro Di Pauli. E po dopo, pai fruts, la Pimpa par furlan.
Come simpri la jentrade al festival e je a gratis.
Ma in cheste edizion de Mostre o vin ancje une novitât: il festival si lee al Concors par Tescj Cinematografics in Lenghe Furlane che si davuelç in agns alternâts. Cun di fat il bant al previôt che pe sezion dedicade ai articui di critiche, i tescj a àn di jessi incentrâts su di un film (no furlan) programât inte edizion de Mostre
……………….
Program
· Miercus ai 20 di Novembar
h. 20.00
- Su Re di Giovanni Columbu (Sardigna / Sardegne) 80’ (finzion)
- Vivi achì di Paolo Comuzzi (Friûl) 37’ (doc. di creazion)
- Treulababbu (episodi SU MOLENTI DE ORAMALA) di Simone Contu (Sardigna / Sardegne) 64’ (finzion)
- Sos mortos de Alos di Daniele Atzeni (Sardigna / Sardegne) 31’
- Bentu di Tore Cubeddu (Sardigna / Sardegne) 13’
· Joibe ai 21 di Novembar
h. 20.00
- Urte berri on, amona! di Telmo Esnal (Euskal Herria / Paîs Basc) 107’ (finzion)
- Vilamor di Ignacio Vilar (Galicia / Galizie) 116’ (finzion)
· Vinars ai 22 di Novembar
h. 20.00
- Fènix 11*23 di Joel Joan e Sergi Lara (Catalunya / Catalogne) 96’ (finzion)
- JNK – Oltri la ultime frontiere di Marco D’Agostini (Friûl) 60’ (doc.)
- Velocitat di Ivó Vinuesa (Catalunya / Catalogne) 70’ (doc.)
· Sabide ai 23 di Novembar
h. 16.00 Mostre piçule dal cine pai fruts
- La Pimpa par furlan di Francesco Tullio Altan (Friûl) 59’ (animazion)
h. 20.00
- Barrura Begiratzeko Leihoak di Eneko Olasagasti, Mireia Gabilondo, Enara Goikoetxea, Txaber Larreategi, Josu Martinez (Euskal Herria / Paîs Basc) 90’ (doc.)
- Bevìno une robe (cuint episodi de serie Felici ma Furlans) di Alesandro Di Pauli e Tommaso Pecile (Friûl) 10’
- Lagun mina di Jose Mari Goenaga (Euskal Herria / Paîs Basc) 12’
- Hamaiketakoa di Telmo Esnal (Euskal Herria / Paîs Basc) 4’
- Zela Trovke di Asier Altuna (Euskal Herria / Paîs Basc) 14’
- Deus et machina di Koldo Almandoz (Euskal Herria / Paîs Basc) 9’
- Zeinek gehiago iraun di Gregorio Muro (Euskal Herria / Paîs Basc) 12’ (animazion)
- Visins di cjase di Marco Londero e Giulio Venier (Friûl) 80’ (finzion)
