Udin - 1 e 2 di Dicembar 2017
"Conference regjonâl su la aplicazion de leç regjonâl 29/2007 e previsions futuris"
INTERVENT DI DIEGO NAVARRIA - President de Assemblee de Comunitât Linguistiche Furlane, inte seconde zornade, intal Salon dal Parlament de "Patrie dal Friûl", a Udin sabide il 2 di Dicembar dal 2017.
La Redazion del Blog intal complimentâsi cun Diego Navarria pal so bielonon intervent (un dai miôr scoltâts il 2 di Dicembar!), lu ringrazie par vêi permetût la publicazion dal test del so intervent.
Brâf Diego!
Denuncie fuarte, juste e di fâ cognossi
ator in Patrie e fûr de Patrie!
.................
Udin,
ai 2 di Dicembar dal 2017
Bundì
a ducj.
O
crôt che se o sês achì al è parcè che par voaltris la lenghe
furlane e je un valôr. Une robe che e vâl, che e je impuartante,
che si à formade vie pai secui, che e à prodot une leterature,
poesie, che e je stade tramandade par gjenerazions, dai nestri vons,
dai nestris gjenitôrs. E la lenghe furlane e je pardabon inlidrisade
te tiere dal Friûl, tal so paisaç, te so art, te sô musiche, tal
mangjâ e tal bevi. Une lenghe al è un mût di viodi il mont. No che
i furlans a sedin miôr o piês di chei altris popui. Dome son
diferents, e la marcadure plui fuarte de diference e je propite la
lenghe.
Alore,
cuant che si à in cjase une robe di valôr dal sigûr no si la bute
tal cjast. Anzit, si la met te vetrine, tal puest miôr de cjase, par
protezile e mostrâle a ducj. Pe lenghe furlane, par tancj di lôr,
al capite compagn. Si dâ valôr ae lenghe furlane, si le ten in
cont, ma dome in cierts ambits. No dapardut e in ogni ocasion. Chest
al vûl dî dâ ae lenghe un valôr limitât a ce che e rapresente, e
no a ce che e covente. Come tignî cont une vecje panarie tal tinel
che e je biele di viodi ma no covente a nuie, o come vê un biel
cjavedâl parsore di un fogolâr simpri studât.
Chel
che al mancje ae plui part dai furlans e je la cussience di vê no
dome un valôr ma ancje un dirit. Il dirit di doprâ la lenghe in
ogni ocasion de vite: te scuele, tal lavôr, tai uficis publics, in
glesie, in buteghe, tai gjornâi, te television, da par dut.
Dirit
ricognossût de Costituzion de Republiche Taliane, des leç dal Stât
e de Regjon e tes normativis europeanis. Il dirit al è clâr
e sigûr ma nol ven, fale di cualchidun, ni doprât ni pretindût. No
ven doprade cundut che o sin sigûrs che no doprantle, la lenghe no
reste simpri compagne come chê panarie o chel cjavedâl, ma si le
piert, e par simpri.
Parcè
mancje cheste cussience dal dirit che invezit altris popui e àn
fuarte? La analisi le a àn za fate i studiôs: si clame procès di
minorizazion. Par mil agns la lenghe furlane e à resistût a dut.
Ancje dopo la fin dal patriarcjât, ancje cu la division dal Friûl
tra Vignesie e l’Imperi, e à mantignût la sô unitarietât e la
sô vivarositât. I problemis a son rivâts cu la ocupazion taliane
dal 1866, e dal 1918 pal Friûl orientâl. Il Stât talian, une vore
nazionalist, al à subit metût in vore il sproc di Alessandro
Manzoni “Una d’arme, di lingua, d’altare” e duncje al à
cirût di scancelâ o parâ fûr chei che, sbaliant, al clamave
alloctoni (come i todescs o i slâfs) o di sotanâ chei come i
furlans, gjavant ae lôr lenghe la dignitât di lenghe. Improibît
fevelâ par furlan a scuele, tai uficis, in ducj i ûs publics; planc
a planc butât fûr des glesiis; fin a rivâ al pont di vergognâsi a
fevelâlu. E dopo: scancelâ de scuele la storie dal Friûl, jemplâ
la int di iredentisim, di Sacri Confini della Patria, ancje se chei
confins e jerin te tiere di altris popui
Al
è clâr che cun 150 agns di chest lavôr metodic e studiât no si
pues pretinti che la int e vedi cussience dai siei dirits
linguistics. Fûr di cualchi cjâf iluminât, che par fortune o vin
vût, la plui part dai furlans al è analfabet te sô lenghe, no
cognòs la sô storie e duncje si compuarte di bon e fedêl talian e
dispès al è il prin nemì de lenghe furlane.
Podìno
fâi une colpe? No. Parcè che la sô cundizion e je come chê des
feminis di cent agns fa che nancje si insumiavin di fâ valê il
dirit di paritât cui oms. Fale di cualchidune plui iluminade, la
plui part e jere cunvinte di jessi inferiôr al om. Lu diseve ancje
la leç!
O
ai fat chest paragon parcè che cuant che une situazion, come apont
la cundizion des feminis o la minorizazion dal furlan, e je
ingangrenide di masse timp, no son vonde lis leç di tutele e di
promozion, no son vonde i progjets e i plans di politiche
linguistiche. A son dal sigûr il prin passaç e a son indispensabii,
ma non son vonde.
Lis
relazions che o vin a pene scoltât a son plenis di riferiments di
leç positivis, di progjets une vore biei, ma tal stes timp a palesin
une situazion une vore grivie pe lenghe furlane. Cheste peraule
“grivie” e stade ripetude une vore tes relazions. No covente che
o torni a marcâ lis mancjancis che a‘nd è masse, i ritarts cence
fin, il disinterès, ancje la ostilitât, pal valôr plui unic che
vin in Friûl. E mi complimenti cui grups di lavôr e cui
coordenadôrs pe cualitât une vore alte des relazions. In chest
lavôr preseât che nus reste ae fin de Conference o vin la analisi
dai ultins cinc agns e lis propuestis pal cuincueni a vignî. Saraial
vonde vê chest par salvâ la lenghe furlane? No. No nol bastarà!
Ma
se no podìn dai la colpe ai furlans di no vê cussience dai lôr
dirits, pe lôr sotanance, come che no podìn dai la colpe aes
feminis di cent agns fa pe lôr sudizion, di cui saraie la
responsabilitât?
La
responsabilitât e je dute de politiche. Ma no de politiche
linguistiche. O vin viodût che, ancje se o vin un plan di politiche
linguistiche fat bon de Regjon za di doi agns e mieç, ma no je la
volontât politiche di metilu in vore, al è dut dibant.
La
lenghe furlane e à ducj i struments linguistics, di cjarte e
digjitâi, che pocjis altris lenghis di minorance a àn. O vin une
vore di personis di alte competence tal cjamp tecnic e sientific,
come ta chel de didatiche e de comunicazion. E ju vin viodûts ancje
te cheste Conference. Si podarès dîsi che no nus mancje nuie. Ma se
il bon esempli, il spieli, il model, nol ven dai sorestants, massime
di cui che al guvierne la Regjon, al è dut dibant.
Coleghis
sindics furlans, che o fevelais simpri par furlan cui citadins, te
ostarie e ancje te Zonte, parcè no lu fevelaiso tal Consei Comunâl
e, almancul cualchi volte, tai discors publics? Conseîrs Regjonâi,
che par trê cuarts o sês furlans e che te buvette dai passi perduti
o fevelais par furlan tra di voaltris, o vês un sisteme di traduzion
simultani, parcè isal nome un che lu dopre di regule? President
Franco Iacop, che con me tu fevelis simpri par furlan, tropis voltis
âstu presiedût il Consei Regjonâl par furlan?
Cun
modei cussì a valin pôc ancje i bêçs in plui che l’Assessôr
Gianni Torrenti al disarâ di vê assegnât ae ARLeF chest an. Cun
modei cussì al è un miracul che la maiorance dai gjenitôrs e
domandedi ae scuele di insegnâ il furlan a so fi.
Cualchidun
al podarès dîsi: ma ancje i politics, come che o vin viodût pe int
comune, no àn colpe se no àn cussience dai dirits linguistics. NO!
No puedin jessi scusâts! Cui che si cjape une incarghe publiche no
pues dîsi di no cognossi i dirits dai citadins e nancje al pues
metisi a cincuantâ. Se nol sa, al à l’oblic morâl di studiâ e
il dovê di cussience di dâsi di fâ!
La
Assemblee de Comunitât Linguistiche Furlane e fasarà la sô part: e
à za previodût par l’an cu ven une schirie di cors di formazion
pai sindics e aministradôrs locâi, in colaborazion cul Cirf, di
inmaneâ a zonis vie pal Friûl.
La
cundizion de lenghe furlane e je grivie. E pues ancjemò jessi
recuperade, ma no se si continue a agjî come tai ultins 10 agns. Dîs
agns de aprovazion de leç regjonâl 29/2007 ogjet di cheste
conference scuasit butâts vie. I prin cinc a cirî di no meti
in vore la leç o almancul intardâ la sô aplicazion, cuntun
president che al à dit par radio che tutelare il friulano è una
cazzata.
I
ultins cinc agns cuntune presidente che in dutis lis ocasions e à
marcât che la autonomie si cubie cu la virtuositât, che la nestre
Regjon la merete parcè a varessin une buine aministrazion. E lis trê
lenghis di minorance che a caraterizin la Regjon? Dutis trê
incjantonadis in nancje metât di un dai 90 Servizis Regjionâi. E di
fat, sabide stade, mi à meraveât scoltâ, ae Conference de lenghe
slovene, la Presidente Serracchiani sierâ il sô salut disint che:
nella nostra Regione ci sono tante culture e che FORSE è anche per
questo che siamo speciali. Jo o dîs: forse anche?...
Cence dubis, almancul par me, la responsabilitât e je
de politiche.
O
speri che al sedi clâr che chestis racladis che mi tocje dâ no àn
nuie di personâl. Il pericul al è stât marcât cun precision tes
relazions di cheste Conference di verifiche e jo, in rapresentance de
Comunitât Linguistiche Furlane, no pues tasê, se al covente par
salvâ la lenghe furlane e l’identitât e la autonomie dal popul
che le fevele.
Diego
Navarria
President
de Assemblee
de Comunitât Linguistiche Furlane
