Bundì, mi clami Bruno Colledani e o soi conseîr comunâl di minorance a Spilimberc e o us scrîf par descrivi la situazion là che mi cjati pal sempliç fat di tabaiâ par furlan in consei comunâl.
Da simpri o feveli nome par furlan in consei e di simpri la maiorance (Pdl + Lega Nord) a mi sta mitint stralecs a no finî par rindimi dificil l'espletament dal gno dirit di tabaiâ par furlan (leç 482/99, articul 7, come 1). A no mi è mai stât impedît di esprimimi par furlan (a mancjares altri!) ma a no àn mai palesât a clâr la lôr no-volontât politiche di permeti che ducj a capissine i gnei intervents (traduzion in simultanee e in economie cun personâl dal comun, par esempli, come proviodude dae 482/99 articul 7, come 3 "Qualora uno o piú componenti degli organi collegiali ... dichiarino di non conoscere la lingua ammessa a tutela, deve essere garantita una immediata traduzione in lingua italiana").
In reonte, in gnei intervents par furlan a no vegnin verbalizâts.
Di rezint la maiorance a si è aprovade un regolament che, seben no impedint al conseîr di esprimisi par furlan, di fat a j dinee cualsisei verbalizazion in câs che a nol voli ripeti l'intervent par talian o a nol voli voltâ par talian ducj i siei scrits.
E parcè jo, par esercitâ un gno dirit, varessio di cjamâmi di una reonte di vore?
Chest intun Comun là che al esist un asesôr ae Identitât culturâl (Marco Dreosto de Lega Nord) che al definis "straçarie spindi bêçs pal furlan"!
Us aleghi un link jessût intai ultins dis sui cuotidians locâls su la "cuestion Spilimberc" e us saludi ducj di cûr, domandant di pandi cheste mail a plui personis pussibul (mailing list, blogs, articui e vie discurint) par che a si saveti trop dure che e jè fâ valê i dirits linguistics a Spilimberc e, purtrop, in dut il Friûl.
Mandi
Bruno Colledani
