sabato 1 dicembre 2012

FINÂL DAL FESTIVÂL EUROPEAN "LIET INTERNAZIONÂL"




FINÂL
DAL FESTIVAL EUROPEAN

LIET INTERNAZIONÂL

1.12.2012


Usgnot a Xixón, intes Asturiis,

si varà la finâl dal Liet International, il plui impuartant festival european pe musiche in lenghe minorizade. In gare a son 11 finaliscj che a cjantin par asturian, basc, breton, catalan, cors, frison, gaelic, bas-todesc, sami, udmurt e furlan. Pe maiorance des personis che a lein chest messaç e che o ai pôre che no saran di chês bandis si pues però viodi la serade sul sît www.rtpa.es di 9 e un cuart di sere indenant.

Cun di plui ancje il public al pues votâ, in sale o sul sît: www.liet-asturies2012.com



-----------------

Doman di sere

(domenie ai 2 di Dicembar)

a sunin in Friûl un dai grups plui impuartants inte storie de musiche basche dai ultins agns, ven a dî i Berri Txarrak. L'apontament al è alì dal Cas'Aupa (vie Val Aupa, 2) di Udin a tacâ di 9 di sere (21.00).


Buine musiche a dutis/ducj.



1 commento:

  1. Cui aial vinçût?

    http://www.ondefurlane.eu/liet-international-2012-i-vincidors/

    La edizion 2012 dal Liet International, il festival european pe musiche in lenghe di minorance, che chest an si è davuelte a Gijón/Xixón, (Asturiis – Spagne) si è sierade di pôc.

    La serade finâl di fat e je stade il moment di ponte di trê dîs di events dulà che a jerin protagoniscj musiche e culture tes lenghis mancul pandudis. Lis lenghis a son stadis al centri di chestis zornadis cui concierts dai grups selezionâts pal festival, cu le cunvigne sul rapuart jenfri minorancis linguistichis e musiche e cu la proiezion dal documentari Lingue in musica di Marco D’Agostini realizât a Udin in ocasion de edizion 2011 dal Liet International.

    La serade finâl si è davuelte tal teatri dal centri culturâl Laboral, il plui grant des Asturiis e chel cu la miôr acustiche. Sul palc si son sfidâts 11 grups in rapresentance di ancjetantis lenghis e regjons di Europe, il lôr obietîf vinci il premi di miôr gnove cjançon in lenghe di minorance sunade dal vîf.

    A àn viert il conciert i Dopu Cena, un grup cors di vot elements che al interprete la tradizion dal cjant cors in clâf moderne. E je state po la volte dai bascs Enroke, une zovine rock band che e à puartât dute la sô energjie sul palc dal Liet International. Lis vôs di Claudia Crabuzza e Claudio Gabriel Sanna compagnadis di un biel rangjament a àn puartât il public tes cjaldis atmosferis algheresis.

    De Sardegne si è po passâts in Scozie cun Brian Ó hEadhra e il so toc vôs, ghitare e armoniche une vore leât ae tradizion musicâl gaeliche. E je stade po daspò la volte dai zovins udmurts IB&4CP e dal lôr pop fresc e origjinâl. Grande energjie e professionalitâts pai “parons di cjase”, la Asturiana Mining Company, che e à cjapât dentri il public te sô esibizion. Yldau, un doi dut feminin, al à puartât lis sonoritâts frisonis in clâf moderne sul palc dal festival.

    Atmosferis plui rock e grancj assolo di ghitare pai FURLANS Jonokognos che, cu la vôs cjalde di Luca D’Angela, a àn scjaldât il teatri dal Laboral. La vôs intense di Lleuwen, cjantautore bretone di divignince galese, une vere incarnazion dal multilinguisim des minorancis, e à incjantât il public.

    E à sunât po la zovanissime Ingire Karoline Gaup, cjantautore sami di 17 agns, che e à jemplât il teatri cu la magjie dal nord Europe. Gran finâl cui The Voodoolectric, un grup dut energjie, divertiment e tante voie di balâ rivât de basse sassonie.

    La spiete par cognossi i nons dai doi vincidôrs e je stade jemplade di une super esibizion dai Dixebra, un jenfri i plui impuartants grups de sene asturiane dai ultins 25 agns, che al à sunât in centenârs di puescj ator pes Asturiis, pe Spagne e pe Europe. Il prin grup asturian a vê partecipât al Liet International tal 2008.

    Il teatri al è sclopât cun cjançons e bai che lu àn scjassât intun miscliç di lenghis e voie di stâ insiemi.

    Fuarte la azions dai zovins asturians presints in sale che a domandavin a gran vôs il ricognossiment de uficialitât de lôr lenghe.

    Par finî lis premiazions.

    Sfide al ultin vôt pal prin premi, assegnât de jurie internazionâl, che ancje chest an e à premiât une femine: la cjantautore bretone Lleuwen e il so toc “Ar gouloù bev”. Seconts par un vôt i cors Dopu Cena.

    Vincidore dal premi dal public la Asturiana Mining Company.

    I premis a son stâts consegnâts de Diretore gjenerâl de politiche linguistiche, Ana Maria Fueyo Llaneza, e di mr. Alexey Kozhemyakov, Diretôr de Segretarie de Cjarte europeane pes lenghis regjonâls o minoritariis dal Consei di Europe.

    Apontament al an che al ven!
    ---------------

    RispondiElimina