Vergogne! Sbregade la bandiere del Friûl di Bepi Agostinis. Cui isal stât?

COSTITUZIONE ITALIANA

Art. 3

Tutti i cittadini hanno pari dignità sociale e sono eguali davanti alla legge, senza distinzione di sesso, di razza, di lingua, di religione, di opinioni politiche, di condizioni personali e sociali.

Art. 6

La Repubblica tutela con apposite norme le minoranze linguistiche.

-------------

VERGOGNE ! 

Sbregade la bandiere del Friûl

di Bepi Agostinis!

(…) Cuant che o stevi par cjapâle su, mi soi acuart che e jere dute ingrumade, “strani o ài pensât” nol jere cuissà ce aiaron, le cjapi sù par metile sui blecs di "velcro" su la aste, cuant che o viôt che e je sbregade tal sen orizontâl, un colp tal cûr, o soi stât cence peraule e fer par cualchi moment. Al è clâr un nazionalist "viliac", parcè che un che al fâs cence vê il coragjo de so azion, al è pôc di viliac. Parcè lu aial fat? (…)

------------ 

LETARE DI DENUNCIE DI BEPI AGOSTINIS

Cuntun grant marum o vuei contâ chel che mi è capitât domenie 11 di març.

O jeri lât sù a S. Marie dal Gruagn in Comun di Moruç , par jessi dongje insieme a altris furlans. ae femine di Riedo Pup, pe celebrazion de  messe in ocasion dai dîs agns de  muart dal so om.

Come che o fâs in ciertis ocasion o vevi puartât la bandiere dal Friûl che le met fûr, come par solit, te maniere di un labar, par vie che metude cussì, la acuile si la viôt simpri, e parsore o vevi fat une scrite a pro di Pup: "Juste ricuardâ l'om, ma ancje il so amôr pe lenghe, un sintiment che al varès di travanânus ducj".

Viodût che insieme al ricuart di Pup si ricuardave, in chê dì, i 40 agns de fondazion  dal grup alpins di Dalnì, o ài metût la mê bandiere su la puarte sierade a çampe de puarte centrâl, li che no dave fastidi al corteu dai alpins che a jentravin in  glesie.

Par dî la veretât e jere la uniche bandiere furlane.

Finît messe o soi vignût fûr par cjapâ su la bandiere e metimi viers il cjampanili, par no dâ fastidi ai alpins che a lavin di che altre bande.

Cuant che o stevi  par cjapâle su, mi soi acuart che e jere dute ingrumade, “strani o ài pensât” nol jere cuissà ce aiaron, le cjapi sù par metile sui blecs di "velcro" su la aste, cuant che o viôt che e je sbregade tal sen orizontâl, un colp tal cûr, o soi stât cence peraule e fer par cualchi moment. Al è clâr un nazionalist "viliac", parcè che un che al fâs cence vê il coragjo de so azion, al è pôc di viliac. Parcè lu aial fat? No me cjapi cui alpins, ancje parcè che  l'alpin al è un simbul une vore fuart dal nestri Friûl, e si sintin une vore furlans, di fat la lenghe furlane e je la lôr  lenghe cuant che si cjatin.  Ma come in dutis lis fameis, magari infiltrât, la piore nere e salte simpri fûr.

O al è un nazionalist oltranzist, forsit si è impensât  dai scrits di Riedo, che nol jere tant morbit, sedi cu lis servitûts militârs e sedi cui sorestants dal esercit, o se invezit lu à fat pal discors de grande Patrie Italie, alore al è un puar diaul che nol sa ce che al vûl dî Patrie. Lu dîs par talian par jessi clâr :

" Patrie: territorio e popolo che vi risiede, unito da una lingua e dall'uniformità di cultura e tradizioni."

Par nô furlans il Friûl al à dutis chestis cualitâts, par chest al è la "Nestre Patrie", e no piçule come che spes si sint a dî, e je Patrie e vonde dome che o vivin e o fasin part de Patrie Italie.

Il "grant" e "piçul" al è dut relatîf, ce ise la Italie in confront a dut il mont, une piçule part, ma par nô e je grande pe sô storie pe sô culture, pes sôs tradizions,  duncje la difindin  cuintri chei che a fevelin mal di jê, e cussì nô furlans o difindin ancje il Friûl cu la stesse passion, parcè che lis lidrîs che a sùpin tal passât, nus dan la fuarce par lâ incuintri al avignî, simpri libars di  pandi il nestri amôr e la nestre passion pal nestri Friûl.

Visaitsi une robe; come cuant che al è vignût il President Napolitano a Udin, su la stesse bandiere o vevi scrit parsore: "nô o sin un popul fin che o varìn la nestre lenghe", duncje, fin che si sintarà fevelâ furlan o varìn la nestre Patrie.

Furlans bisugne tignî dûr, e soredut come che al à dite Bons. Corgnali, durant la predicje, o vin bisugne che a nassin fruts furlans. Ancje in France che a veve il stes problem agns  indaûr , e àn fat des leçs che àn  ribaltade  la cuestion. Cuissà che i nestris sorestants no imparin alc ancje dal forest.

Bepi Agostinis

-------------

La lettera di denuncia di Bepi Agostinis è stata pubblicata sul settimanale “La Vita Cattolica” e sul quotidiano “Il Messaggero Veneto”.