giovedì 16 gennaio 2014

COMPAGNIIS FILODRAMATICHIS SVEÂSI!! BISUGNE REAGJÎ - di Bepi Agostinis



APEL PE NESTRE CULTURE
E NO DOME FURLANE


COMPAGNIIS FILODRAMATICHIS

SVEÂSI!!

BISUGNE REAGJÎ

di
Bepi Agostinis


Il Friûl simpri plui sotan a lis necessitâts e pai interès di Triest, in particolâr te Culture.

Strani, la Regjon a colp e à cjatât i 14 milion di euros pal lôr Teatri triestin. Chescj bêçs a son servîts par paiâ i debits, che di sigûr fats cence pensâ al doman, cence badâ a lis spesis (a varan dite: tant e pense ben la Regjon). Biel che invezit, il Teatri Zuan di Udin al siere i conts in atîf o in paritât.

Intant la Regjon di buride par meti a pâr il belanç al taie in Friûl: gjavant dal dut i za pôcs 40 mil euros dal an passât che veve ricevût il Teatri Club, che oltri la sô rassegne Teatrâl di Teatri Civîl, a gjestìs da plui di 40 agns, il "Pali Studentesc de citât di Udin", gjestint dute la programazion dant dut l'impegn a fin che il Pali al vadi indenant simpri al miôr, e dome cuntune impiegade in ufizi (duncje se lis robis a laran cussì, ancje jê a fasarà part de schirie dai disocupâts).

Chest al vûl dî sierâ une ativitât che à coinvolt miârs di fantats, e no dome de citât di Udin, ma ancje de Provincie. Une manifestazion che dave ai fantats la pussibilitât di vierzisi a un mont par lôr gnûf, e par cualchidun la pussibilitât di continuâ daspò come professionist tal Teatri, e no dome come atôr ma ancje tant che tecnics di sene. Di sigûr i fruts che à vevin sielzût cheste ativitât, la vevin preferide e lis inutilis pierditis di timp pasadis a butâle in fraie te stradis o tai locâi publics; duncje fantats plui cuiets su chest front, e di sigûr la lôr vite e sarà plui ecuilibrade, parcè che fâ Teatri al vûl dî ancje serietât e impegn.

Duncje il Pali oltri che un impegn culturâl al servìs di sigûr ancje tant che discors sociâl. Gjavâ il Pali e je une vergogne, che la Regjon a varès di domandâ scuse ai tancj fruts entusiascj di chest impen. Ma soredut domandâ "venie" a chês personis che da agns a lavorin cun passion e amôr par che cheste manifestazion a vadi indenant simpri al miôr, in prime persone, la “passionarie” Angela Felice.

Ma nol baste, al puar Friûl, la "Madrigne" Regjon e à gjavât dut il finanziament ancje ae "Associazion Teatrâl furlane", za ridusude l'an passât a 40mil euros, cumò nuie.

Une associazion che gjestìs plui di 50 Compagniis filodramatichis, sparniçadis in dut il Friûl, dulà che a puartin i lôr lavôrs in grant part in lenghe furlane in ducj i paîs e paisuts dal Friûl, dulà che no rivin lis Compagnis professionistis, duncje un lavôr di fin, impuartante pe nestre culture teatrâl, cussì a fassin amâ il Teatri. E ancje culì l'uniche persone che a à un stipendi, che za l'an passât al è stât smiezât, a restarà disocupade.

Ma la robe che mi a dât un grum fastidi, al è che no je stade nissune reazion da bande dal ATF a part il sbroc dal President Mezzelani sui gjornâi, ma des Compagnis?

 CIDINÔR !

Pûr viodût l'esempli dal Teatri Club, va ben, vuidât da une femine che pal Teatri e pai siei fruts a larès ancje in cjâf al mont.

Cjars filodramatics, e je ore di bati un colp, cuintri lis injustiziis, e no si po stâ a spietâ la buine stele, bisugne reagjî e protestâ viers chei politics che nô ju vin metûts in chei puescj, duncje fâi capî, che no son stâts elezûts, par sodisfâ lis esigjencis dai lôr partîs, che in maniere strane a cjalin simpri viers Triest, ma par dâ une man al nestri Friûl.

SVEÂISI !


Bepi Agostinis

………


La lettera a firma di Bepi Agostinis è stata pubblicata il 16 di Gennaio 2014, sul settimanale “La Vita Cattolica” - Ud


Nessun commento:

Posta un commento