domenica 17 aprile 2011

ONDE FURLANE NO MOLE !



Concierts e dj a pro de radio
Sabide ai 23 di Avrîl, al circul Edera di Codroip

Sabide ai 23 di Avrîl, al circul Edera di Codroip, serade di no pierdi par judâ la “Radio libare dai furlans” cun cualchidun dai grups miôr de etichete Musiche Furlane Fuarte (e no dome) compagnâts des selezions di tocs proponudis di un pôcs dai dj’s di ponte de emitente. Dopo di 30 agns di ativitât un dai mieçs di comunicazion che al à promovût cun plui snait la culture zovanîl e alternative si cjate in dificoltât par vie dai tais pesants decidûts de aministrazion regjonâl.
Ta chest moment dificil a son propit i ambients, i artiscj e lis associazions che Onde Furlane e à simpri valorizât, a mobilitâsi par difindi cheste realtât culturâl cussì impuartante.
Sul palc dal Edera a sunaran il cjantautôr Loris Vescovo (finalist za dôs voltis al Premi Tenco), il cuartet Orchestra Cortile (une des novitâts plui origjinâls dal panorame musicâl par furlan) e la zovine Lavinia, lançade tant che dj de emitente furlane e cumò biele novitât dal cjantautorât indie pop.
Ae taule di missaç: Mezza & Topp from School’s Out e UP Crew.
Intant de serade si varà ancje il batisim de associazion Lenghis dal Drâc – Amîs di Onde Furlane”, nassude cun chê di sostignî la radio.
La jentrade e je sore nuie par ducj i socis dal Edera. Intal circul si podarà ancje iscrivisi ai “Amîs di Onde Furlane” o contribuî cuntune donazion.

----------------

Lenghis dal Drâc – Amîs di Onde Furlane (  http://www.ondefurlane.eu/lenghis-dal-drac-amis-di-onde-furlane/  )  e je une associazion che no à fins di vuadagn nassude par judâ Radio Onde Furlane cu la racuelte di fonts; la organizazion di events, concierts, mostris, dibatits o cors; la produzion di periodics, ricercjis, e libris; la colaborazion a nivel locâl e internazionâl cun ents e cun associazions che a lavorin par finalitâts similârs.




Nessun commento:

Posta un commento