Comitât pe Autonomie e pal Rilanç dal Friûl

Zuanfranc D’Aronco
Relazion al Comitât pe Autonomie e il Rilanç dal Friûl
dai 12.02.2008

Cjars amîs, voaltris o savês che il nestri Comitât al inviulà ai 25 di Novembar 2006 une Assemblee costituent publiche tal Cjistiel achì a Udin, tal salon dal Parlament de Patrie dal Friûl. Al è in chê volte che il Comitât si presentà cuntun so program detaiât, a traviers une rieste di documents fats stampâ e po daspò publicâts ancje sui sfuei di chenti, che ancje vuê si puedin lei. A àn par titul “L’apel ai furlans”, “La Assemblee des Provinciis pal autoguvier dal Friûl”, “Autonomie, motôr dal svilup locâl, “Teritori e ambient”, “Culture, lenghe e storie dal Friûl”.
 A jerin analisis e propuestis, firmadis di studiôs e politics, di docents universitaris, di professioniscj. O vevin la smire di jemplâ un vueit lassât di masse oms di partît, atrats di prospetivis plui vantazosis, tirâts pe gjachete cumò di Triest e cumò di Rome. Che a pierdevin cussì di viste i vêrs problemis de lôr tiere, clamade Friûl fintremai inte Cjarte Costituzionâl e, cundut achel, restade une sclagne espression gjeografiche. Voaltris lu savês che: daspò la vuere a son disparidis la Vignesie Tridentine par lassâ spazi al Trentin-Sud Tirôl, la Vignesie Euganie rimplaçade dal Venit. E je restade invezit la Vignesie Julie, ma cence teritori: tant che al sarès plui just clamâle Triest, cjapant dentri aromai la sengule citât cui cinc Comuns dal Cjars. Il Friûl - che par vastitât di teritori e par popolazion al rapresente la part maiôr di une regjon artificiâl - il Friûl al dipent di un podê che al è inalgò. La colpe e je ancje dai furlans.

Ma no sin achì par fâ polemichis: pluitost, par dâ une olmade a ce che di positîf, come Comitât, o sin rivâts a meti in cjamp in chescj mês. Persuadûts che ae fin la reson e scugnarà cjapâ la volte.

La lenghe e je la cjarte di identitât di un popul. Al esist un Friûl storic, dulà che in largje part si fevele par furlan: cussì come che si fevelin, in ciertis zonis, a jevât e a tramontane, lengaçs slovens e todescs. A son lenghis minoritariis che - pes disposizions europeanis, par une leç nazionâl e par une leç regjonâl - a van difindudis e anzit valorizadis. Fevelant di lenghis, a àn autoritât i linguiscj, o cussì almancul al semee; ma no ducj lu acetin, e i arlêfs a vuelin insegnâ ai mestris come Tullio De Mauro. Par chel al inten la nestre azion, o sin plui voltis intervignûts, folcjant sul Consei regjonâl parcè che e vignìs fate buine la leç su la lenghe furlane e di chês altris realtâts minoritariis, daspò che al veve fatis sôs lis nestris posizions il stes president de Regjon. La cunvigne des rapresentancis furlanis, che si è davuelte il mês di Setembar stât alì de Universitât di Udin (cui intervents di Illy, dal retôr magnific, dal vescul, dal sindic), e à lassât la sô olme, tal sens che la leç e je stade po daspò fate buine. Daûr di chest passaç fondamentâl un pôcs di contrastadôrs - di diestre come di çampe, che a calcolin il furlan piês che se no la gjandusse - si son messedâts cul fin di tirâ fûr trainis di incostituzionalitât: in cheste bulade a àn indreçât dutis lis lôr energjiis, fasint crodi che no si trate di une ore facoltative di furlan ae setemane, ma de imposizion dal furlan a cui che no lu vûl, magari al puest dal talian. Ancje chest al zove a fâ politiche. Un altri nestri intervent, intai rivuart dai parlamentârs: la richieste, in Otubar, di meti dentri tal gnûf statût regjonâl - in esam al Parlament - la Assemblee des Provinciis furlanis, che e je ae fonde stesse de esistence dal nestri Comitât. Ma la richieste, che no jere state acolzude dal Consei regjonâl (fat in maiorance di furlans: furlans insin che no scjavalcjin il Timau), e je finide come che e je finide la legjislature.

O vin inmaneât inte sede de Regjon, tant che altris ocasions, un impuartant incuintri sui problemis de economie: ancje achì cun intervents di rapresentants, oltri che dal mont politic, des associazions, dai lavoradôrs, dai industriâi.

Us vignarà iniment la conference stampe di novembar su la riforme urbanistiche e il plan teritoriâl regjonâl, cu la presentazion di un document (opare di professioniscj e di docents di grande innomine), dulà che si refudave un progjet di grandis trasformazions, imponudis sul teritori cence nissun rispiet des autonomiis e cence valutazions sul cont des conseguencis suntun ambient di alt valôr naturalistic e storic. Si veve domandât un rinviament dai tiermins masse strets pes osservazions: non vin vude gran udience. O tornarin a cjatâsi achì di un mês.

O vin metût adun - in acuardi cu la Universitât, cu la “Vite Catoliche” e cun altris associazions - un grup di lavôr, che al varà di definî lis iniziativis sul cont de evoluzion dai rapuarts tra Furlanie e Slovenie daûr dal resint slargjament de aree Schengen. Viodût che la Slovenie e confine soredut cu lis provinciis di Gurize e di Udin, aes celebrazions di Triest al covente zontât incuintris di studi che a vebin di tocjâ ancje nô: e ju frontarin ben insot.

Cualchi nestri amì nus domande parcè che o fasìn dut chest. Lu fasìn parcè lu considerin un dovê intai rivuarts de nestre tiere. Vadì che se la sere o stentin a cjapâ sium, nol è dal sigûr parcè o vin pôre di pierdi la cjadree, co no vin piç e nancje no nus passe pal cjâf di lâ a cirîlis. Dentri vie dal Comitât, no o fasin cont dome su lis cjadreis che o vin achì, in cheste stanzie cjolte sù in afit a oris, che a dîle sclete no son nancje comudis. Fûr di achì, ognidun al po decidi dome par se, massime sot votazions, ma no a non dal Comitât. Par vie che la nestre fuarce e sta tal no jessi partît, o ben tal incidi sui partîts.

Di cincuante agns in ca o vin un probleme che al spiete che o rivedin a cjatai la soluzion: une fate logjiche come che la veve proponude Tessitori, che tal 1955 al bateve sul claut de istituzion di un Friûl Regjon par cont so, e par Triest un so statût particolâr. Dutun in chel la stesse cjosse la sostignive, cu la sô grande autoritât, don Sturzo, che si domandave in Senât a Rome se propi al convignìs “mantignî unide al Friûl la Vignesie Julie cuant che cheste e à problemis cussì diviers e cussì momentôs e di cussì grande puartade di conseâ la formazion di un statût particolâr”. E al zontave: “Il Friûl al varès di vê il so statût speciâl cence plui spietâ la metude in vore dal sisteme regjonâl unitari”. Nuie.

Rindìnsi cont. Vuê o sin ridusûts a domandâ, in face a un centralisim simpri cressint, une cualchi misure di autoguvier. La Assemblee e je stade votade di doi dai trê Consei provinciâi, ma cumò si va indenant “adagio, quasi indrio”, cemût che juste apont a disin a Vignesie. Partant, ancje di cheste bande, bisugne scombati ogni dì. Al diseve un patriot talian dal Risorziment, Carli Cattaneo, sostenidôr pe Italie di une soluzion federalistiche: “La forza ha differito le questioni, non le ha sciolte”. E cussì al è par nô vuê. Nus tocje lâ indenant a fâ la nestre part. (Zuanfranc D’Aronco - Relazion al Comitât pe autonomie e il rilanç dal Friûl, dai 12.02.2008)

Zuanfranc D’Aronco