martedì 21 giugno 2011

GNOT DI SANT ZUAN - JOIBE ai 23 di JUGN dal 2011




GNOT

DI SANT ZUAN

JOIBE
ai 23 di JUGN dal 2011

"la jentrade e je gratuite"

A Culugne, te aree verde di
Vie Damiano Chiesa
(dongje dal cjamp di balon),
aes 9.00 di sere,
si torne a vivi in poesie e musiche
une gnot magjiche te tradizion furlane.

“Al sucêt di agns e agnorums……che lis stagjons a corin, che il soreli al tocji il pont plui alt tal solstizi d’Istât di Jugn, che la gnot dai 23 di Jugn a sedi la plui curte, e che il fûc e la aghe a vignedin doprâts tant che elements magjics….Ator ator dai fûcs si cjantave e si balave e te vee jenfri la gnot e la buinore, lis rosis bagnadis de rosade a lusivin tant che segnâi. Altanisie, jerbe di Sant Pieri, vermene, jerbe di Sant Zuan, osmarin, savôrs, lavande, salvie, mente, rude a son jenfri chês che a vegnin cjapadis sù ancjemò vuê par fâ il Mac.
Te gnot di Sant Zuan e va in flôr ancje la felete: une jerbe che nissun al viôt mai in flôr parcè che tal moment che e sflorìs te stesse gnot e va in semence e e torne come prin.
Un segnâl di lûs, tant che un fûc, chi dongje Felet, dome par cheste gnot:
Sonia, Tiziana, Silvia, Priska e Lucia nus judaran a jentrâ ta cheste (atmo)sfere terestre e magjiche.”
La serade e sarà centrade sul teme des “Jerbis magjichis”. O varìn di fat une antropolighe e ricercjadore, Sonia Zanier, che nus introdusarà, cun fâ inmagant, lis jerbis dal Mac di Sant Zuan compagnade di Cristina Cescutti. E daûr, lis poetessis Tiziana Novello e Silvia Lanfrit che nus pearan ae cjadene magjiche des peraulis che a tocjin lis cuardis dal profont. E sù de profonditât nus tiraran fûr lis notis de vôs e de ghitare di Priska, dal violin di Lucia Clonfero e di un ospit forest, Andrea Bettini, che al compagnarà lis feminis cul piano.

In câs di ploie la serade si tignarà al Teatri Bon di Culugne.

E je une iniziative dal Comun di Tavagnà – Sportel pe Lenghe Furlane – in colaborazion cun la Cooperative di Informazion Furlane/Radio Onde Furlane e la direzion artistiche di Lucia Gazzino de Associazion Pionîrs.

L’event al è patrocinât de Provincie di Udin.

Nessun commento:

Posta un commento