mercoledì 10 marzo 2010

Grant Sfuarç Colaboratîf

Al samee che la Zonte Regjonâl si meti a inviâ une gnove propueste di leç in materie di autonomie locâl e dai rapuarts di cheste cu la aministrazion regjonâl, ma in dute la sô complessitât, cuntune vision organiche no framentarie, no ispirade al contingjent, ma al rûl che regjon e sisteme des autonomiis a àn di cjapâ in prospetive, metint al centri des sieltis il citadin.

Si impon, par chest, la esigjence di un progjet globâl di grues respîr, e par chest a van fissâts tant che in vie preliminâr e par chest orientative dai contignûts dal progjet stes, liniis di vuide, orientaments, obietîfs, jentrant no dome tal pûr tecnicisim e pensant invezit, in vie strategjiche a chel che al pues jessi il model plui valit pal guvier des comunitâts locâls dal doman, tignût cont ancje des lôr specificitâts, de lôr storie e des lôr carateristichis.

Nol è di sigûr positîf pensâ subit a procès disgredeatîf des autonomiis di fonde, cuant invezit , se chescj a scugnaran jessi,a varan di burî fûr des sieltis conseguentis ae atuazion di un progjet globâl e strategjic . Nol è par nuie positîf pensâ a soluzions che, in non di une presumade e plui alte eficience de istituzion locâl a tibiin la rapresentance dai citadins e duncje i orghins eletîfs e cun conseguent deficit di democrazie. Il Comitât pe autonomie e il rilanç dal Friûl al conferme che tra i obietîfs di fonde par un futûr progjet auspicabil, al va metût al prin puest chel di une Regjon cun podês legjislatîfs di alte direzion e di programazion che e trasferissi lis funzions aministrativis cun risorsis finanziariis e di personâl al sisteme des autonomiis locâls. Di chest al va jù dut il rest, cjapant dentri la articolazion dal trasferiment a lis diviersis istituzions locâls, singulis o associadis , o a une gnove forme istituzionâl locâl (aree vaste, e v.i.) Al à di sei ancje l'obietîf di dâ vôs aministrative, cence gjavâ nuie ae unitât de Regjon, a lis grandis realtâts teritoriâls, che a son ben specifichis, di cheste regjon: Triest e Friûl. La entitât e la puartade dai problemis e je di sigûr tal domandâ ae aministrazion regjonâl di fâ un grant sfuarç elaboratîf, svolant alt, par fermâ prin di dut, i obietîfs di fonde des riformis e par instradâ un fuart procès di consultazions in particolâr dai aministradôrs locâi, di categoriis, di diviers organisims, stimolant il lôr apuart par predisponi daspò, a conclusion, il progjet di leç.

Cuant che si fevele dal destin des istituzions no si po ignorâlis o passâi parsore, bisugne scoltâlis e disegnâ insieme il futûr che lis rivuarde. L'auguri conclusîf al è che se une gnove riforme e varà di jessi, cheste no si tradusi in une leç che si zonte dome a chês che a son stadis fatis prime e che come chês e sedi daspò sostanzialmentri puare di efiets.

Bepi Agostinis segretari dal Comitât pe autonomie e pal rilanç dal Friûl.

Nessun commento:

Posta un commento