lunedì 26 luglio 2010

"Curtis e che si tocjn" Patrie dal Friul di avost

Duncje : il President de Republiche Napolitano al è stât di sigûr masse pôc a Udin e in Friûl. Al à però dit avonde di ce che i furlans si spietavin di lui e che no vebin mai sintût di altris Presidents de Republiche vignûs achi , tai ains passâts . Ven a stai che il Friûl al à une sô storie,une sô culture,une sô lenghe . Ch’al sint fuart la dibisugne dal autoguviêr e ch’al pratint ,rispiet a Triest , une funzion centrâl tai rapuarts di pâs,di amicizie e di svilup cun l’Europe centrâl e orientâl . A tancj che dut chest ai furlans lu dinein , vuè o podin rispuindigi che ancje il President de Republiche la pense come noaltris .
Cui ch’al si spietave che il President al dises di plui, a si è dismenteât che lui nol à podês esecutifs,come i omps di guviêr . La sô figure e je di alte garanzie costituzionâl,di inpen par fâ rispietâ la Costituzion e lis leçs dal Parlament . E cussì lui al à fat rispiet ai dirits costituzionai dai furlans che i soi interlocutôrs ai vebin presentât tai discôrs e sui gjornâi ,in chescj diis ma che j vebin mandât prime , ancje a Rome . Cun lis sôs peraulis il President de Republiche al à cussì dât une alte cuviergidure ai nestris dirits.
A son purtrop i politics,i lôr partits di cjampe e di drete che fin cumò a son restâs cidins rispiet aes afermazions dal President. E a ce che j spiete di fâ a lôr – a Rome e a Triest - par rispietâ e meti in vôre la Costituzion de Republiche,lis Convenzions europeanis,lis leçs talianis come la 482.
Ai furlans che vuè,come îr,anzit plui di îr ,a pretindin il rispiet dai lôr dirits ae valorizzazion de lôr identitât,de lôr lenghe,dal lôr dirit al autoguviêr , ae autonomie, gj spiete duncje di rinfuarcjà la lôr batae par puartâle al sucès . Cjapânt dentri simpri plui zoventût,int furlane ancjemò incerte,di ogni lûc dal Friûl,Comuns,Categoriis produtivis,Sindacats dai lavorents . Parce che un Friûl plui furlan al sarà ancje plui braurôs de sô incressite economiche e sociâl .
Arnalt Baracêt

Nessun commento:

Posta un commento