O vin sintût in chescj dîs dal rinovament de Convenzion Regjon-RAI su lis trasmission in lenghe furlane e de metude adun de Comission regjonâl pal insegnament de marilenghe. A chest proposit il nestri plui vîf complasiment, ma no podin sotliniâ che - da plui di dîs agns de leç statâl e dôs de leç regjonâl - chescj struments a restin biel lontan dal jessi metûts pardabon in jessi, e che chest al met in seri pericul il futûr de nestre lenghe.
"in primis" al è par nô un fuart motîf di preocupazion la situazion des struturis regjonâls che e son clamadis a ocupâsi des politichis di pupilance e di meti adun lis normativis in vore. Il servizi regjonâl competent, di fat, al è da scuasi cinc mês cence il diretôr, biel che la Agjenzie pe lenghe furlane - come che al à declarât di pôc il so president, Laurinç Zanon - ancjemò nol à il personâl minim suficient a mandâ indenant la ativitât ordenarie dal Ent.
Cun di plui, no rivin a comprendi la "ratio" di cierts tais fats tal belanç regjonâl, come ancje chei dal setôr de istruzion e de formazion universitarie. Par cheste ultime, l'an passât a son stâts stanziâts 100 mil euros, du là che chest an nol è stât metût tal belanç nancje un euro. Si domandin, inalore, come che al sarà pussibil garantî l'insegnament dal furlan se e no saran metûts a disposizion lis risorsis necessariis pe formazion dai students universitariis e dal personâl docent.
Ancje lis scuelis a varan di rinunziâ a scuasi al 20% dai fonts erogâts l'an passât, par l'insegnament de lenghe e de culture furlane, e chest, cun dut che e je une continue domande di bande dai istitûts scolastics, par vie che a son numerosis richiestis dai gjenitôrs, rivant a une medie dal 60% , ma che in ciert ples a rivin ancje al 80% e 90% . E esist la normative, e esistin desenis e desenis di scuelis e centenârs di insegnants che si dan da fâ par garantî la trasmission di un patrimoni culturâl inestimabil. E par chest al è necessari che la nestre Regjon e corispuindi a lis legjitimis richiestis dai gjenitôrs, ancje parcè che e dispon di sôs competencis in materie e di une specifiche leç regjonâl pe grant part confermade de Cort costituzionâl.
Nô si augurin, duncje, che in curt a vegnin disgredeâts i problemis struturâi pe aplicazion des leçs di pupilance e che, in sede di assestament dal belanç, a sedin stanziadis lis risorsis par garantî la formazion universitarie e l'insegnament de lenghe e de culture furlane tes scuelis
IL COMITÂT PE AUTONOMIE E PAL RILANÇ DAL FRIÛL
il President ZuanFranc D’Aronco
Nessun commento:
Posta un commento