sabato 1 marzo 2014

NO LASSIN MURÎ LA RIVISTE "GNOVIS PAGJINIS FURLANIS" -




SCRITÔRS E LIBRIS

IN MARILENGHE



NO LASSIN MURÎ

LA RIVISTE
 

"GNOVIS PAGJINIS FURLANIS"!
 
L ’ amont di “Gnovis Pagjinis Furlanis”

La storie de nestre riviste “Gnovis Pagjinis Furlanis” e semee dabon rivade insom.

Chest che al ven fûr in maniere sclagne al podarès sei juste apont l’ultin numar daspò trente agns di presince seguitive.

Di cui la colpe? No dal sigûr nestre, che o vin simpri metût il massim impegn e tante passion tal tirâ adun i tescj e tal puartâ po in stamparie il lavôr di publicâ. La colpe e je ad in plen de politiche che e à decidût di taiâ dal dut i contribûts ae Union Scritôrs Furlans. Cun di fat tal 2013 ae nestre associazion nol è stât dât nancje un centesim di euro di contribût. In chestis condizions al è evident che no si po lâ indenant.

Come ogni an o vin fate la domande di contribût ae Provincie di Udin “pal davuelziment di ativitât di tutele de lenghe furlane e di altris lenghis minoritariis L.R. 1/2006 e L. R.24/2006”, ma no vin otignût nissune rispueste. Tal 2012, cu la stesse domande o vevin otignût un contribût di mil (1000) euros. Cun mil euros o vin publicât dodis numars dal mensîl “Ladins dal Friûl”, un libri come suplement di “Ladins dal Friûl” (“Scritôrs e libris in marilenghe – Schedis di leterature furlane”) e il numar XXX di “Gnovis Pagjinis Furlanis”. Vadì che no vevin doprât il contribût par stampâ lunaris, e nancje par organizâ la sagre de polente fate cul sorc di cincuantin. Evidentementri un tant nol è bastât. O ben no vin ni sants e ni santui che nus travuardin.

E je vere che i timps a son chei che a son e che bisugne taiâ e sparagnâ dapardut. Ma dant une cjalade sun chest cont ae delibare de Provincie di Udin dai 2 di Dicembar stât, o cjatìn che invezit o son stâts dâts contribûts ae “La Patrie dal Friûl” (5.000 euros), ae associazion “Glesie Furlane” (5.000 euros pe ristampe di un libri di pre Antoni Beline + altris 5.000 par stampâ un libri di Duili Cuargnâl), ae “Societât Sientifiche e Tecnologjiche Furlane” a son stâts dâts 1000 euros, ae “Societât filologjiche furlane” inmò 1000 euros. Ma chestis a son dutis associazions che a cjapìn bielzà contribûts in maniere direte de Regjon jessint considerâts “ents ricognossûts pe ativitât di valorizazion e promozion de lenghe furlane”.

Par esempli la Clape “La Patrie dal Friûl” e à vût 20 mil euros, la Associazion Sientifiche e Tecnologjiche Furlane 5 mil euros, la Societât filologjiche furlane 200 mil euros. No je une cuestion di invidie, e je une cuestion e di justizie.

Par dutis chestis resons lis decisions de Zonte provinciâl di Udin nus àn jemplât di marum e fats restâ cetant malapaiâts, ma soredut a son decisions che a àn mancjât di rispiet ae memorie di Agnul M. Pitane (1930/2005) che ai 27 di Fevrâr dal 1982, parie cun Renzo Balzan, Zuan Marie Basso, Antoni Beline, Ovidi Colussi, Duili Corgnali, Mario De Apollonia, Zuan Frau, Celso Macor, Zuan Carli Menis, Zuan Nazzi Matalon, Alberto Picotti, Riedo Puppo, Nino Rodaro, Luzie Sasso, Raimont di Strassolt e Ennio Totis, al à fondât la “Union Scritôrs Furlans” e la riviste “Gnovis Pagjinis Furlanis”, cul fin fondamentâl di meti adun i scritôrs di lenghe furlane par: “doprâ la lenghe furlane sedi tal cjamp leterari sedi tal cjamp dai mieçs di informazion; lavorâ a pro dal onôr, dal svilup e de incressite de lenghe e de culture furlane, fin di otignî ancje mediant dal ricognossiment istituzionâl de identitât culturâl furlane; fâ cressi la cussience dai furlans a rivuart de lôr nazionalitât; cooperâ cun spirt di fradaie cun chês altris Sociis che a lavorin cul stes spirt e a pro de lenghe e de culture furlane; infuartî i leams cui scritôrs e cul ambient culturâl di chês altris Tieris ladinis, o sei des Dolomitis e de Svuizare Rumance”.

Come che o vin bielzà dite denant trat, par trente agns la riviste “Gnovis Pagjinis Furlanis” e je stade un pont di riferiment de furlanetât, un lûc di incuintri e di dibatit dai scritôrs furlans e de leterature in marilenghe. E nol va nancje dismenteât che la Union Scritôrs Furlans e à fat part di chel consorzi “Friûl Lenghe 2000”, che al à curât la redazion dal gnûf dizionari de lenghe furlane. Anzit, Agnul M. Pitane al è stât il prin president dal consorzi, oltri che animadôr ferbint de sô ativitât. Ducj chescj acjadiments, oltri che ducj i dibatiments ancje sul cont des leçs di tutele ju cjatìn testemoneâts intes pagjinis de nestre riviste, che e je simpri stade vierte ae colaborazion di ducj.

Ma, come che o vin metût in evidence denant trat, pe Zonte provinciâl di Udin un tant nol baste. E inalore si domandin cun ce cûr che si va a dibati su la decjadence de leterature furlane se propite la Union dai Scritôrs e ven emargjinade e penalizade cence un pêl di rispiet des istituzions.

O vin cussì decidût di fâ jessi chest numar XXXI di “Gnovis Pagjinis Furlanis”, cuntun numar ridot di articui e di pagjinis, doprant in maniere significative la stesse cuviertine dal prin numar dal 1983, paiantlu juste apont cui bêçs tirâts fûr de nestre sachete. Lu fasìn parcè che la riviste no merte di jessi fate murî in maniere cussì dissavide, e inte sperance che alc di positîf al puedi inmò sucedi par podê lâ dilunc a tignî impiade cheste lum di sclete furlanetât.
 

(Renzo Balzan – dean de Union Scritôrs Furlans – Dicembar 2013)


da

Anade ( XVII ) n.3 Març 2014

LADINS dal FRIÛL

e-mail : ladinsdalfriul@gmail.com     



3 commenti:

  1. Incredibil! Pussibil che la Province di Udin, o la politiche regjonâl, no rivin a cjatâ 1.000 euros di contribût pe associazion "Union Scritôrs Furlans"?

    O sin daûr a fevelâ di 1.000 euros e no di milions....

    RispondiElimina
  2. Trop sono i milions dâts al teatri Verdi di Triest par taponâ une busone di debits? 17 milions di euros (14 milions di debit taponât de regjon + 3 milions dome pal 2013) !

    E podopo si sparagne copant une vore di realtâts culturâls impuartantonis furlanis che e domandin un carantan di finanziament ?

    RispondiElimina
  3. "
    " From: Renzo Balzan
    Sent: Saturday, March 15, 2014 1:57 PM
    To: Undisclosed-Recipient:;
    Subject: gnovis-pagjinis-furlanis

    Mandi! Cul alegât Us mandìn, in formât pdf, la nestre riviste "Gnovis Pagjinis Furlanis - XXXI/2013".
    Dal formât in cjarte a son stadis stampadis dome 50 copiis, che a son stadis spedidis aes Bibliotechis
    e aes istituzions culturâls plui impuartantis dal Friûl e de Ladinie Dolomitane.
    Un graziis a ducj chei nus sostegnin e nus judin inte bataie che o stin puartant indenant parcè che
    "Gnovis Pagjinis" no vebin di murî. Ogni ben! (rb)

    Renzo Balzan
    ---------------

    RispondiElimina