3 di Avrîl - "Fieste de Patrie dal Friûl" a Udin: FRIÛL 2014. DATIS, STORIIS, SIMBUI, VISIONS

3 di Avrîl

"Fieste de Patrie dal Friûl"

a Udin
..........

FRIÛL 2014.

DATIS, STORIIS, SIMBUI, VISIONS

"Friûl 2014. la Fieste de Patrie a Udin" al è il program di iniziativis metudis adun de bande dal Comun di Udin, in ocasion de "Fieste de Patrie dal Friûl", cun chê di memoreâ cheste ricorence e di ufrî oportunitâts di cognossince e di riflession sul Friûl di vuê.

Assessorato alle lingue minoritarie/Assessorât pes lenghis minoritariis

Assessorato alla cultura/Assessorât pe culture

Joibe ai 3 di Avrîl, h. 15.00

Biblioteche civiche “V. Joppi”,

Sezion Moderne -

Sale Corgnali Rive Bartolini 5, Udin

Taule taronde cun

Giuseppe Mariuz Societât Filologjiche Furlane

Carli Pup Radio Onde Furlane e Comitât/Odbor/Komitaat/Comitato 482

Giorgio Banchig Confederazion des Organizazions Slovenis - SSO

Velia Plozner Comission regjonâl pes minorancis di lenghe todescje

Linda Picco za borsiste e assegniste di ricercje te Universitât dal Friûl

Renato Rinaldi documentarist e ricercjadôr

coordenament di Marco Stolfo - Furlan in Comun

La investidure dal Patriarcje di Aquilee, Siart, tant che “Comes Fori Iulii, dux et marchio” de bande dal imperadôr Indrì IV, ai 3 di Avrîl dal 1077, al è un fat impuartant te storie dal Friûl.

Cun di fat, la atribuzion al Patriarcje de jurisdizion civîl e militâr sul teritori furlan e in maniere mutevule ancje su diviers teritoris dongje, mantignude par trê secui e mieç, e je stade determinante tal definî la unitât e la unitarietât dal Friûl e il so specific profîl linguistic e culturâl.

Par chest motîf, chê date e ven memoreade tant che “Fieste de Patrie dal Friûl”.

 

Chest an la fieste e devente ancje la ocasion par imbastî une riflession cun plui vôs e cuntun tai multidissiplinâr su inovâi, simbui e visions contemporaniis dal Friûl, tra memorie storiche, atualitât e avignî.

 

Un resonament di cheste fate al puarte, in particolâr, a meti dongje i 3 di Avrîl dal 1077 e la Joibe Grasse dal 1511, la storie che a àn daûr e cemût che a son stâts interpretâts a partî propit de Fieste de Patrie e dai 27 di Fevrâr, che di une desene di agns incà a vegnin memoreâts tant che “Zornade Furlane dai Dirits”.

Il confront al tocje il Friûl di lenghe furlane e il Friûl tant che tiere multilengâl e multiculturâl cuntune sô specifiche “unitât te diversitât”. Cun di plui, su la fonde di esperiencis specifichis di ricercje, e je la ocasion par scomençâ a viodi cemût che su cheste unitarietât a sedin diviersis visions sogjetivis e fintremai confusions e distorsions ideologjichis, massime par ce che al tocje la dimension teritoriâl e un simbul tant che la bandiere.

E in Sale Ajace a Udin a 9 di sere…..

Il secont event de zornade al è il "Conciert pe Fieste de Patrie dal dal Friûl", che si tignarà te Sale Ajace, a 9 di sere.

L'apontament, inmaneât par cure de Clape di Culture Patrie dal Friûl, al previôt la esibizion dal côr "Vôs di Vilegnove" di Vilegnove di S.Denêl. La serade e ten dongje un repertori di cjantis popolârs e vilotis di autôr cun leturis di tescj di pre Antoni Beline, pre Checo Placerean e pre Roman Michelot.

La partecipazion ai events e je libare e gratuite.

Altris informazions si cjatin achì: www.comune.udine.it/Furlan_in_Comun.

La manifestazion Friûl 2014. la Fieste de Patrie a Udin e va indenant fintremai ai 30 di Avrîl.

Chest messaç al è un invît a partecipâ e a fâlu savê ator.

http://www.comune.udine.it/opencms/opencms/release/ComuneUdine/cittavicina/Furlan_in_Comun/fiestedePatrie2014.html?style=1

FURLAN IN COMUN
Sportel pe Lenghe Furlane dal Comun di Udin

e-mail: furlan.incomun@comune.udine.it
tel. +39 0432 271623
http://www.comune.udine.it/Furlan_in_Comun/