LA GNOT DAI MUARTS - Tra peraulis, leturis e musiche - LUNIS AI 31 DI OTUBAR A TAVAGNA'

Par antîc, diviers popui de Europe a crodevin che la gnot jenfri i 31 di Otubar e il prin di Novembar e fos chê che e segnave il passaç tra un an e chel altri, tra la stagjon de lûs, dal cjalt e dai cjamps che a produsin, e la stagjon dal scûr, dal frêt e de tiere che e somee muarte. (…)

La Gnot dai Muarts – come che si le clamave in Friûl – e viodeve i paîs furlans scjavaçâts des processions dai muarts, animis che par une gnot a tornavin dal mont di là, intant che lis lôr fameis a metevin fûr cjaldîrs plens di aghe par che a podessin distudâ la lôr sêt (…).

 

La Gnot dai Muarts

tra peraulis, leturis e musiche

Lunis ai 31 di Otubar

tal Centri Civic di Tavagnà

a tacâ des nûf di sere

(21.00)

Par antîc, diviers popui de Europe a crodevin che la gnot jenfri i 31 di Otubar e il prin di Novembar e fos chê che e segnave il passaç tra un an e chel altri, tra la stagjon de lûs, dal cjalt e dai cjamps che a produsin, e la stagjon dal scûr, dal frêt e de tiere che e somee muarte.

Par secui a dilunc chê e je stade viodude tant che une gnot incjantade là che no si incrosavin dome agns e stagjons, ma ancje il mont dai vîfs e chel dai muarts, il mont dai oms e chel des creaturis magjichis.

Par chest, dopo dal sucès de iniziative pe Gnot di Sant Zuan che si è davuelte ai 23 di Jugn tal Teatri Bon di Culugne, il Sportel pe lenghe furlane dal comun di Tavagnà, cu la colaborazion di Radio Onde Furlane e de Associazion Pionîrs, al propon une altre serade speciâl, lunis ai 31 di Otubar dal 2011, alì dal Centri Civic a tacâ des nûf di sere (21.00).

La serade e sarà vierte di une conference di Carli Pup su “La Gnot dai Muarts te tradizion furlane”.

La Gnot dai Muarts – come che si le clamave in Friûl – e viodeve i paîs furlans scjavaçâts des processions dai muarts, animis che par une gnot a tornavin dal mont di là, intant che lis lôr fameis a metevin fûr cjaldîrs plens di aghe par che a podessin distudâ la lôr sêt.

Une gnot cun significâts profonts e dispès dismenteâts, ma che no à ancjemò pierdût dal dut la sô cjarie di magjie.

Cussì la ostarie letarie in rêt Contecurte, che pe ocasion e cjaparà il non di Pôrecurte, e proponarà la leture di une schirie di contis di pôre, di autôrs furlans dal dì di vuê, coordenade dal curadôr dal blog Raffaele Serafini.

A sierâ la serade nol podeve mancjâ il grup musicâl plui scûr de musiche furlane, Francis and the Phantoms, vuidâts dal estrôs talent dal cjantant, scritôr, senegjadôr, speaker radiofonic Checo Tam, unic artist in Friûl titolâr dal grant “slam”, di fat tai ultins agns al à vint il Premi S. Simon di Codroip, il Concors pes Senegjaduris dal C.E.C e il Premi Friûl di Onde Furlane.

La jentrade e je libare.