STÂTS GJENERÂI DES LENGHIS MINORITATIIS: DÔS PROPUESTIS

Stâts gjenerâi

 des lenghis minoritariis

Miercus il 23 di Fevrâr 2011

Udin

DÔS PROPUESTIS

(SECONDE PUNTADE)

------------

Lis Propuestis dal

COMITÂT PE AUTONOMIE E

IL RILANÇ DAL FRIÛL

 

Il  timp a disposizion al è masse ristret par podê elaborâ rasonaments di merit e par chest o clarìs dome cualchi pont  a non dal Comitât pe Autonomie e il rilanç dal Friûl.

1) che vegni pûr cheste iniziative baste che il "scoltâ" no "svapori" tal timp, e che  no si pandi dibant, e ancje parcè che la Regjon e cjapi pardabon  cussience, cui fats e no dome cu lis declarazions, che la coesistence positive di ben trê minorancis linguistichis, a mutivin par une buine part il so jessi vuê Regjon speciâl.

2) In 10 agns di vite  de leç regjonâl 482, rivade daspò 50 agns di bataiis, i finanziaments che i spietìn a son planc a planc diminuîts, a son aromai ridusûts a une entitât tâl che nus puarte a pensâ cuasi cuasi a une cjolte in zîr des minorancis linguistichis.

3) Lis  trasmissions RAI puartadis indenant par pôcs minûts in lenghe furlane in vie sperimentâl, graciis ai fonts regjonâi, a son fermadis  e no par demerit o par inutilitât  des stessis. A son agns che o disin che il furlan al à di jentrâ tai contrats di servizis Ministeri-RAI dongje al sloven. Plui voltis la Comission parlamentâr di Vigjilance e à dât opinion favorevul, ma dibant. Une altre volte il Consei di Aministrazion de RAI e à aprovât il contrat di servizi cence il furlan, in barbe ae leç 482 e ae volontât dal Parlament, ce fasarâe la Regjon? E restarà a cjalâ o afrontarâ il problem insieme a chei de emitentis locâls privadis che a curin lis trasmissions in furlan?

Al è un servizi public che al va garantît.

4) Oltri che  valorizâ la lenghe, al covente valorizâ ancje la storie, la culture di un popul.

5 ) Cuant che la Cort Costituzionâl e à  sentenziât, confermant l'implant, su la, leç regjonâl 29 dal 2007, e à dât un sugjeriment impuartant: dilatâ lis competencis de Regjon cun gnovis normis di atuazion dal Statût de Autonomie. Il riferiment al è tal  articul 3 di chest ultin. Il nestri Comitât cul President de Provincie di Udin, cul Sindic di Udin, la Retore de Universitât di Udin, la Glesie si son incuintrâts cu la Delegazion Regjonâl de Comission Paritetiche e cul so President. E je stade esaminade  une ipotesi di norme che e je stade judicade fatibil. Parcè dut tasiâl?

6) La Regjon a no  po ignorâ che e à une sô leç (la 29) pal insegnament dal furlan tes scuelis.E à di aplicâle  prime che il grup  cidin, che e je la stragrande  maiorance dai gjenitôrs dai students, e decît  di no jessi plui cidine. Bisugne concludi daurman cui adempiments aplicatîfs che a son une vore in ritart, scoltant  e tignint cont des opinions  dai esperts consultâts.

No si à simpri di cirì un rimpin par no fâ nuie.

7 ) La Regjon e à di vê une fuarte iniziative politiche, (ma par fâ chest e à di crodii) viers il Stât e ancje viers se stesse.

La cuestion " fonts " e " bêçs " no je dome statâl, e je ancje regjonâl e la regjon no po dismenteâlu.

Il puartevôs dal Comitât pe

Autonomie e il rilanç dal Friûl

Bepi Agostinis

--------------------

LIS PROPUESTIS DAL

Comitât 482

Aromai a son cuasi dîs agns che il Comitât – Odbor – Komitaat – Comitato 482 al è impegnât intal difindi i dirits linguistics des comunitâts dal Friûl. Chest impegn nus à permetût di viodi di dongje i svilups des politichis di promozion linguistiche metudis in vore sei a nivel regjonâl, sei a nivel statâl. Al è duncje su la fonde di cheste esperience che o profitìn dai Stâts Gjenerâi des lenghis minoritariis imbastîts de Aministrazion regjonâl par fâ indenant des propuestis concretis su la politiche linguistiche pal furlan.

1) La Regjon e à a disposizion une gnove leç par promovi la lenghe furlane – la L.R. 29/07 – ma no le dopre. Se e je vere che si pues simpri fâ di miôr, chel istès si trate di un imprest pardabon impuartant nassût di un moment di confront e di dibatiment significatîf. Par chest o crodìn che meti in vore cheste leç al sarès un pas indenant impuartant pe promozion dal furlan. Par chel che o savìn, la leç no je stade inmò metude in at par vie che, dopo trê agns che e je stade fate buine, i regolaments atuatîfs no son stâts ancjemò aprovâts. La aprovazion di chescj regolaments e la aplicazion de leç 29/07 nus somee duncje une prioritât.

2) Par meti in vore lis leçs di tutele e di promozion linguistiche e par controlâ che si lu fasi pal miôr a coventin ancje struments operatîfs adats. E je sante scugne alore superâ la situazion di precarietât che e à segnât intai ultins agns i organisims che a son clamâts a chescj compits, a tacâ de Agjenzie Regjonâl pe Lenghe Furlane e dal Servizi regjonâl che al viôt des identitâts linguistichis. No si pues po fâ di mancul di un coordenament continuatîf tra i doi Assessorâts regjonâi che si dividin lis competencis di chest setôr ancje parcè che la politiche linguistiche a pro dal furlan, ancje se declinade in mûts e contescj diferents, no pues che jessi unitarie.

3) La politiche linguistiche si svilupe su plui cjamps, chei di fonde a son trê, ven a dî: scuele, media e aministrazion publiche. Se no si metin risorsis suficientis in ducj e trê i setôrs si cjatisi cuntune politiche linguistiche çuete. Intai ultins doi agns lis risorsis regjonâls pai mieçs di comunicazion che a lavorin di plui par promovi la lenghe furlane – o sei lis emitentis radiotelevisivis privadis – a son stadis azeradis. Si à duncje di comedâ daurman cheste situazion prime di causâ dams definitîfs al panorame, za debul, dai mieçs di comunicazion par furlan. Par chel che al rivuarde lis ultimis gnovis sul contrat di servizi jenfri Rai e Guvier talian, si cjatìn al tierç contrat di file (ven a dî nûf agns e passe) di violazion de leç 482/99: une situazion scandalose.

4) Par che lis ativitâts par promovi il furlan puartadis indenant sei dai sogjets privâts che di chei publics a funzionin al miôr e covente continuitât e e je bisugne che i timps burocratics par assegnâ e dâ fûr i finanziaments regjonâi a sedin sigûrs e il plui pussibil centrâts sul imprin dal an. Cun di plui, massime tai moments là che lis risorsis a son di mancul, al è impuartant poiâ soredut chei sogjets che a svilupin une funzion strategjiche pe lenghe e a son in stât di garantî criteris di cualitât e di continuitât dal servizi ufiert.

5) Un altri element une vore impuartant al è chel di garantî la stabilitât di chei elements che a son la fonde par cualsisei politiche linguistiche, a tacâ de grafie uficiâl e de presince di une varietât standard (che e compagni lis varietâts locâls). Ogni pas indaûr su chescj aspiets al volarès dî strassâ agns di lavôr e dutis lis risorsis che a son stadis dopradis fin cumò pe normalizazion linguistiche.

Il puartevôs dal Comitât 482

Carli Pup