STÂTS GJENERÂI DES LENGHIS MINORITARIS: CEMÛT ISE LADE?

Stâts gjenerâi

des lenghis minoritariis

Miercus 23 di Fevrâr 2011

Udin

CEMÛT ISE LADE?

PRIME PUNTADE

------

Setemanâl ilFRIULI
n.7 – il 25 Fevrâr 2011

http://www.ilfriuli.it/if/

Il mont dal furlan si da dongje

di Federica Angeli

Inviade la discussion dai prins “Stâts gjenerâi des lenghis minoritariis”, cun tancj cantins che a restin ancjemò vierts.

Trê dîs pes lenghis mi­noritariis, par scoltâ esigjencis, dibisugnis e conseis. Chest l'obietîf dai assessôrs regjonâi Elio De Anna e Roberto Molinaro.

Daspò di todescs e slovens, la trê dîs si è sierade cui stâts gjenerâi de lenghe furlane.

Passe 100 personis in rapresentance di ents, associazions o singui citadins, si son dadis dongje tal auditorium regjonâl. Pecjât che i politics a jerin pôcs, dut câs il numar al è alt considerât cemût che si è publicizât l'event e cemût che si son invidadis lis associazions.

TAL SEGN DE CONTINUITÂT

"Continuitât" e je la peraule che si è sintude plui dispès tai 35 intervents regjistrâts.

Ducj a àn domandât che si rivi a garantî la continuitât dai finanziaments, parcè che daspò di 15 agns de aplicazion de L.R. 15/96, 10 agns de L. 482/99 e passe 3 de L.R. 29/07, no si pues plui fâ une politiche linguistiche serie cun progjets una tantum, cui fonts che a rivin tart e la pro­gramazion plurienâl che e re­ste un miraç.

AVIGNÎ INCIERT

La situazion e je grivie: taiâts i fonts pai programs radio/tv in convenzion cu lis emitentis privadis e la Rai, tierç contrat di servizi Rai che nol ten cont des disposizions de L. 482/99, nissun ricognossiment pe formazion dai insegnants, il depotenziament de Agjenzie Regjonâl pe Lenghe Furlane, la precarietât contratuâl di ducj i operadôrs dal setôr.

In chest panorame si spietin ancje­mò i regolaments atuatîfs de L.R. 29/07. Argoment che al urte l'assessôr De Anna cuant che al ven nomenât pe prime volte di Kristian Franzil, assessór dal Comun di Udin, ma che al è stât pò ribatût a fuart te plui part dai intervents.

Un strument di politiche linguistiche la regjon lu à za e, se si lu metès in vore, tancj dai problemis di vuê si risolvaressin: programazion plurienâl, programs radio/tv, plans di politiche linguistiche, didatiche.....te leç, si fevele di dut, ma dopo passe 3 agns e je ancjemò letare muarte.

Biele la iniziative di scoltâ lis vôs dai esperts, positîf l'impegn cjapât dai assessôrs tal setôr de comunicazion, ma si spere che dut chest nol sei doprât par posticipâ ancjemò a timp indeterminât la scriture dai regolaments de L.R. 29/07, la uniche robe che e covente pardabon.

---------