LETARE VIERTE

Al è furlan ma al risulte fat in “Venezia Giulia”

Chest Franconia produsût a Cividât

al puarte tant che indicazion geografiche tipiche “Venezia Giulia”.

Intune letare vierte indreçade al assessôr Claudio Violino, al president de Provincie di Udin Pieri Fontanini e ai Consorzis di Tutele dai vins Doc de Furlanie, 22 nons di rilêf dal mont autonomist a jentrin tes polemichis des ultimis setemanis par marcâ la cuistion de Itg (Indicazion geografiche tipiche) “Venezia Giulia” doprade in dì di vuê par indicâ dai vins produsût in Friûl.

Chest al sucêt parcè tal 96, e je stade acetade la domande dal assessorât regjonâl di istituî il IGT Vignesie Julie pal vin di taule prodot in regjon. No si rive adore a capî parcè che, intant che in Venit a son ben vot denominazions IGT, “inte nestre regjon no si à volût creâ “ancje” une IGT che al fos “in dut câs” indicatîf dal non Friûl. Piês ancjemò, si à scurît il “Vignâl Friûl” cuntune “Indicazion gjeografiche falade”.

“Prime di ipotizâ une malvignude uniche DOC par dut il teritori regjonâl” a van indevant i firmataris, “chei che a scrivin a ritegnin si vedi di in maniere urgjente di domandâ al Ministeri une “seconde” IGT che al permeti ai 6 Consorzis DOC Friûl la pussibilitât di comercializâ il vin di taule furlan cuntune gnove IGT ce che no scurissi plui il “Vignâl Friûl” cemût che cumò al sucêt cun l’IGE (indicazion gjeografiche falade) Vignesie Julie.

Stant che la domande par leç e pues jessi fate dai Consorzis stes, chei che a scrivin si permetin di invidâ i Consorzis DOC Friûl a fâsi part ative inte domande di une seconde IGT regjonâl.

Cun di plui, la indicazion “Vignesie Julie”, in plui di falade, e je vueide e, par ce che al tocje la promozion di un prodot, dibant o danose: di fat e pues puartâ a une confusion cun vins venits, o fintremai “venezians”.

La letare e jentre ancje te cuistion de Doc “Friûl Vignesie Julie”.  I sotscrits a intindin ancje esternâ la lôr contrarietât totâl ae creazion di une uniche “Doc. Friûl Vignesie Julie” cun zonizazion su dut il teritori aministratîf regjonâl e cun sot zonis lis atuâls doc.

Regjonâi. E chest stant che si riten ce cun cheste gnove uniche Doc, si scanceledi in maniere definitive il plui che cognossût, ancje a nivel di marketing, “Vignâl Friûl” (za cancelât sui vins di taule IGT) e i storics doc Friûl (Gravis – Tisane, - Anie – Aquilee, Cuei Orientâi – Lusinç).

In dut câs e je opinion di chei che a scrivin che, se propit si vûl creâ une uniche Doc regjonâl, cheste e pues dome jessi la “DOC. FRIÛL”, metût che su vot Consorzis Doc regjonâi dome doi no contegnin il non Friûl: Doc. Cuei e Doc Cjars. Parcè che mai al à di jessi scurît il non dal teritori dulà che al ven prodot il 95% dal vin doc regjonâl? No isal forsit il vin un prodot tipic che al va leât al so teritori di produzion? E in dut câs, Cormons, zone dal doc Cuei, no isal forsit Friûl? E cuâl isal il teritori dulà che al ven prodot il “Vignâl Friûl”? E parcè, in câs, no creâ une uniche “Doc.Friuli” dome cun sîs Doc che a contegnin il non Friûl inte lôr denominazion regjistrade dal Ministeri tancj agns indaûr?

Cun di plui, al è notori che il non “FRIÛL” al svante une tradizion storiche inimitabile, identitarie e tradizionâl e al identifichi daurman une tiere e i siei prodots, cognossûts in dut il mont par gjenuinitât, cualitât, unicitât dai savôrs. E risulte si che duncje plui incomprensibil, ancje sul plan dal marketing, la propueste di une “Doc Friûl Vignesie Julie” cuant che al è za un bol famôs in dut il mont: Doc Friûl.”

Federica Angeli - Renzo Balzan
Remo Brunetti – Paolo Cantarutti
Adriano Ceschia – Marco De Agostini
Licio De lara - Luigi Del Piccolo
Alberto Fabris - Silvana Fachin Schiavi
Matteo Fogale - Francesco Frattolin
Pre Roman Michelotti – Roberta Michieli
Gottardo Mitri - Elena Pecile
Simone Petris - Linda Picco
Fabiano Rosso – Marco Spizzamiglio
Celestino Vezzi - Giuliano Zelco