Comunicâ in lenghe furlane

Consegnâts 20 atestâts dal cors di secont nivel organizât dal Cirf

Foto di grup dai partecipants. Al centri, la retore Compagno

A son 20 i corsiscj che a àn ricevût l’atestât di partecipazion al cors di secont nivel “Comunicâ in lenghe furlane”, organizât pe prime volte dal Centri Interdipartimentâl di ricercje su la culture e la lenghe dal Friûl (Cirf) de Universitât dal Friûl. Un cors une vore specialistic che, di là des sessions di lezion frontâl e ai laboratoris, tignûts di esperts di lenghe furlane, al previodeve ancje seminaris in lenghe furlane e taliane tignûts di docents universitaris, gjornaliscj, comunicadôrs e esperts.

Te cerimonie di vuê a palaç Florio il retôr Cristiana Compagno, ae presince dal vicediretôr dal Cirf Raimondo Strassoldo e de coordenadore dal cors Alessandra Montico, e à consegnât i atestâts di frecuence a Federica Angeli, Vilma Candolini, Damiana D’Agostini, Roberto Danelon, Arianna Degani, Dorotea Di Marco, Isa Dorigo, Franco Finco, Alessandra Francescutti, Antonella Lanfrit, Gianni Lauzana, Andrea Marmai, Magda Minotti, Giovanni Nazzi, Elisabetta Pozzetto, Marco Seravalli, Elena Zanussi e ai dipendents dal Ateneu Tiziana Ambrosino, Alessandra Montico, Gianluca Franco.

Sodisfazion pe riesside dal cors e je stade esprimude dal retôr Cristiana Compagno che e à ricuardât come «la cualitât de propueste formative e je confermade dai nons une vore impuartants, in diviers setôrs, dai relatôrs e de simpri numerose partecipazion dai corsiscj. La Universitât dal Friûl e je pe sô stesse mission istitutive, impegnade a sostignî la difusion de culture e de lenghe furlane, promovint iniziativis finalizadis a svilupâ competencis lenghistichis pal davuelziment di ativitâts lavorativis in marilenghe inte publiche aministrazion». «In particolâr – e à concludût la Compagno – vê aprofondît la cognossince de lenghe furlane e di un lengaç setoriâl tecnic-aministratîf al pues costruî pai dipendents publics un mût par jessi plui dongje dai citadins e dai utents».

Strassoldo al à evidenziât «la part davuelte de Universitât dal Friûl tal ambit de culture furlane, daûr di ce che al è afermât tal art. 26 de leç 546 dal 1977» che le à istituide.

Il cors, finalizât a promovi la cognossince e la eficacie de comunicazion intes lenghis minoritariis, al jere indreçât al personâl dal ateneu e dai ents publics, gjornaliscj, adets dai uficis stampe, uficis relazions cul public (urp) e ae comunicazion. La iniziative, a partecipazion gratuite, e je stade realizade in gracie dai fonts de leç 482/99 su la tutele des minorancis lenghistichis.

da Il Diari, numar 8 - 21 di avrîl 2010