La storie si le fâs cui documents no cui sprocs.

Inte discussion su la propueste di Violino, tante triste informazion.

Il president Tondo al e informât mâl: il vin Teran al è stât prodot par secui in Friûl. Desenis di documents lu provin. No mi someee nancje che si puedi afermâ che chest vin si identifichi cu la componente venetogiuliana de nestre regjon. La espression, in veretât, mi pâr cence sens.

O cognòs la storie de nestre regjon, cjapade dentri chê di Triest, ma no capis la espression “veneto-giuliana”; mancul ce mancul se e je aplicade a un vin che cumò al è produsût soredut di “carsolinisloveni”.

Mi pâr origjinâl la idee di un bol “julian, julian in maniere tipiche” imagjinade dal vicepresident de Provincie di Triest Valter Godina, a mancul che al puest de peraule “julian” no si intindi meti “sloven”: il non Prosec al è sloven e a Prosec si fevele sloven; vitouska, presnitz, potiza, osmizza no son nons in lenghe juliane, une lenghe che de sô esistence no ai mai savût.

Jota al è non cjargnel, e il president al varès di savêlu; malvasie al è non grêc; refosc al è non furlan... E Godina e je une peraule furlane antighe che si segnave un strument musicâl.

Rivuart ae Serracchiani, e à discuviert la aghe cjalde cuant che e aferme che la identitât di cheste regjon e je fate di diferencis.

In Cjargne a son tancj mûts di fâ i cjalçons cetancj a son i cjargnei. Une altre ocasion pierdude par stâ cidine. Il so al è il “partît che nol è” e no saran ciert chestis banalitâts che a fasaran resurî la Çampe.

ENOS COSTANTINI

Agronom

(letare al Messaggero Venit)

Da Il Diari n° 7