gnûf numar de riviste mensîl par furlan "La Patrie dal Friûl" (www.lapatriedalfriul.com)

Il Comun di Marian al presente il gnûf numar de riviste mensîl par furlan "La Patrie dal Friûl" (www.lapatriedalfriul.com), che e sarà distribuide a gratis al public.


Ta chest sest numar dal 2010, in cuviertine Dino Zoff ma ancje tante atualitât e aprofondiments simpri cuntun voli fur...lanist, "par un Friûl plui furlan".
L'apontament al è par miercus ai 30 di Jugn a lis 20.30 li de sale consiliâr dal comun, in place dal Municipi
DUTE LA CITADINANCE E JE INVIDADE
A intervignaran:
Cristina Visintin, sindic di Marian
Dree Valcic, diretôr da "La Patrie dal Friûl"
Christian Romanini, redazion da "La Patrie dal Friûl"

Comunicât stampe

La Patrie Mondiâl cun Dino Zoff

Mês di Jugn, mês di Mondiâi e par fevelâ di balon chest numar da "La Patrie dal Friûl" (www.lapatriedalfriul.org) si vierç cuntune intervistone al mitic portieron di Marian Dino Zoff che al à regalât cualchi “perle” interessante. Ma chest sport nol è dome dai oms come che e conte Alessia Tuttino, zuiadore di balon ai nivei plui alts. Simpri in teme di balon cualchi altri articul di profondiment su la relazion tra spirit identitari e sport e un articul di Enrico Turloni che al fâs scuvierzi lis nazionâls cence stât. Il numar al va indevant cuntune interviste al president de Provincie di Udin Pietro Fontanini sui siei progjets pe valorizazion e tutele de lenghe furlane. E stant che tancj a fevelin di Unitât di Italie un articul di Sonia Sicco al fâs viodi che chest event al è contestât ancje tal sud Italie. Invezit in ocasion dal 6 di Jugn, aniversari de muart dal patriarcje beât Bertrant (1350, Sant Zorç de Richinvelde) Erika Adami e puarte i letôrs a cognossi il museu dal Domo di Udin dulà che a son i siei furniments.

Pes rubrichis si ricuardin chê su la musiche curade di Mojra Bearzot, lis ricetis proponudis di Meggy Timeus e la rubriche dedicade ae leterature. Il gjornâl si siere cul viaç a Sant Jacum di Galizie contât midiant lis pagjinis scritis di pre Beline “A Sant Jacum, là che al finìs il mont”.

Tal archivi dal sît www.lapatriedalfriul.org si puedin lei ducj i contignûts de riviste fint al mês passât. Si ricuarde che “La Patrie dal Friûl” si le cjate tes miôr librariis e ediculis o si ricêf a cjase par abonament.