--------------------------
W RADIO ONDE FURLANE !
LA LIBARE VÔS DAL FRIÛL LIBÂR!
--------------
Cundut achel
Onde Furlane no mole!
di
Renzo Balzan
Leç nazionâl n.482/99 (Normis in materie di tutele des minorancis linguistichis storichis), art.12: "1) Inte convenzion tra il Ministeri des comunicazions e la societât concessionarie dal servizi public radiotelevisîf e tal conseguent contrat di servizi a son siguradis condizions pe tutele des minorancis linguistichis intes zonis di apartignince. 2) Lis regjons interessadis a puedin inmò sotscrivi convenzions di pueste cu la societât concessionarie dal servizi public radiotelevisîf pes trasmissions gjornalistichis o programs intes lenghis ametudis a tutele, tal contest des programazions radiofonichis e televisivis regjonâls de midiesime societât concessionarie; pes stessis finalitâts lis regjons a puedin sotscrivi acuardis di pueste cun emitents locâls".
Leç regjonâl n.29/2007 (Normis pe tutele, valorizazion e promozion de lenghe furlane), art.20: "1) La Regjon e sosten la produzion di materiâl audiovisîf in lenghe furlane cu la smire di dâi la massime difusion. 2) Tal setôr televisîf, la Regjon e sosten la produzion e la metude in onde di programs in lenghe furlane, intes diviersis espressions. Il sostegn al è proporzionât ae cuvierture teritoriâl e aes modalitâts di inseriment inte programazion. I fonts a son impegnâts almancul pai 75 par cent pe produzion dai cuai almancul il 60 par cent al è realizât di produtôrs indipendents. 3) La Regjon e sosten lis emitents radiofonichis che a trasmetin programs in lenghe furlane. Il sostegn al è proporzionât ae percentuâl di programs trasmetûts in lenghe furlane e a chel produsûts in propi".
Nol covente dî che ce che al è stât proviodûts des leçs di tutele dal furlan, massime par chel che al inten l'ûs e la promozion de mari lenghe inte radio e inte television, al è stât pe plui part discognossût. La RAI, che e à impegns e dovês istituzionâi primaris sun chest cont, no à mai volût savìnti tirant fûr scusis di ogni sorte. Lis emitents privadis locâls a stan fasint ce che a puedin, cun mieçs limitâts e cun risultâts, sot l'aspiet professionâl, avonde limitâts. La uniche emitent che e à mostrât professionalitât e coerence in chest cjamp e je stade la storiche "Radio Onde Furlane", che dut câs cumò e je stade metude in zenoglon par vie dal tai drastic dai contribûts publics, tant che la cooperative (Cooperative Furlane di Informazion) che e gjestìs la radio e je stade obleade a meti in casse integrazion i siei colaboradôrs, ridusint di conseguence la programazion.
O vin dite la "storiche" Onde Furlane no a câs. Daspò che sul scomencâ dai agns '70 e jere stade vinçude la bataie par liberâ l'etere dai monopoli public, ancje chenti a nasseris une biele rieste di radio libaris privadis, come Radio Effe par esempli che tal timp dal daspò taramot dal '76 e cognossè une grande partecipazion. La lenghe furlane e jentrà in scuasit dutis chestis esperiencis, ma in maniere no organiche, no continuative. E al è propite par realizâ une radio dute furlane, par furlan, che ai 2 di Fevràr dal 1980 e nas Radio Onde Furlane. A jerin i agns dulà che al cresseve l'impegn par otignî il ricognossiment uficiâl de nestre lenghe e, intun clime ferbint pes radios libaris, Onde Furlane e invià une mission sacrisante, che di tornâ a dâ dignitât ae nestre fevelade, zontantsi naturalmentri ancje lote pe istituzion de Universitât di Udin. Ma la valence "rivoluzionarie" de piçule emitent che e trasmeteve di un apartament di plaçâl Cella no finive achì: pe prime volte in Friûl, une vôs dai media e veve cûr di oponisi al monopoli dal Messaggero Veneto, creant ancje une rieste di iniziativis culturâls che a lavin ben oltri lis spietis: conferencis, dibatiments, manifestazions, spetacui, publicazions, dutis indreçadis a infuartî la gjestion democratiche e popolâr de informazion.
Ma cui jerino i pionîrs che a àn rindût pussibil chest straordenari cambiament? Doi comerciants, Silvano Pagani e Maurizi Staderoli, un funzionari provinciâl, Sergio Venuti, un insegnant, Federico Rossi, un gjornalist, Mauro Tosoni, un inzegnîr, Giorgio Cavallo, un agjent di cumierç, Maurizio Florissi, un impleât public Elia Mioni, un student, Elio Fedele, une infermiere, Oriella Mion e un impleât di bancje, Roberto Meroi. Tancj di lôr a àn fate ancje cariere, ma a chel timp a jerin dome int comun cuntune grande passion pai furlan e pal impegn civîl.
Vuê Onde Furlane, che e trasmet de sede (di propietât de Cooperative) di strade Volturno e e à tant che diretôr Maur Missane, e à l'aspiet rivilît. I colaboradôrs, i gjornaliscj de redazion, i tecnics a disin che la lôr vôs no vignarà cidinade, ancje se a vessin di mancjâ lis risorsis economichis par paiâ i stipendis. Fantats di laudâ, nuie ce dî, ma nol è chest il cjaveç de cuestion. Il pont al è che, par colpe dal tai dai contribûts publics, la ricjece culturâl che Onde Furlane nus à simpri garantît e sarà mandade sui paradôrs. E il dam nol varà gran rimiedi.
Ma, cemût che o vin ancje titulât chest articul, Onde Furlane no intint istès molâ. Cussì e je stade metude su ancje une associazion di "Amîs di Onde Furlane -Lenghis dal drâç", cul fin di sostignî lis tantis ativitâts radiofonichis, gjornalistichis e editoriâls: la cuote di adesion par dut l'an e je di 10 euros. Inmò, simpri cun chê racuei sostegns economics, a son stadis organizadis dôs seradis-conciert cun innomenâts complès e cjantautôrs furlans. La prime si è davuelte a Codroip, ai 23 di AvrîI stât, la seconde a Tumieç alì dal curtîI dal museu etnografie "Michêl Gortani", ai 17 di Jugn. In ducj i doi i apontaments il sucès al è stât grant.
Aduncje cui che al à a cûr l'avignî de "radio libare dal furlans", cui che al vûl oponisi ae arogance di un podê che al scjafoie lis minorancis e ogni sorte di oposizion democratiche organizade, cui che al à tal sanc in sclip di sintiment libertari, che al dedi une man a Onde Furlane, parcè che salvant cheste istituzion o salvin la nestre lenghe, la nestre dignitât, la nestre voie di no fâsi meti il pît sul cuel.
W Radio Onde Furlane, la libare vôs dal Friùl libar! (renzo balzan)
Gjavât fûr dal numâr “LADINS dal FRIÛL”
ANADE (XIV) N. 7 Lui 2011
Al è ancje di zontâ che di doi agns in ca, la Zonte regjonâl di Renzo Tondo, e à gjavât ducj i finanziaments ae emitentis locâl - radio e televisions - e no à ancjemò metude in vore la Leç regjonâl 29/2007 art. 20
RispondiEliminaVERGOGNE! VERGOGNE! VERGOGNE!