martedì 28 dicembre 2010

LA JOIBE GRASSE DAL 1511


TIERE FURLANE
RIVISTA DI CULTURA DEL TERRITORIO
Dicembre 2010 - Anno 2 numero 4
 Pagine 105/108

LA JOIBE GRASSE DAL 1511
Cinccent agns dal plui grant riviel
de storie dal Friûl
di Carli Pup

O publichin chi sot un tocut di un biel articul di cuatri pagjinis di Carli Pup su la “Joibe Grasse dal 1511”. L’articul complet o podês leilu su l’ultim numâr de bielonone riviste “Tiere Furlane” – Dicembar 2010 – Diretôr Responsabîl Christian Romanini –  Regjon Friûl – Vignesie Julie

Tal 2011 a colin cinccent agns dal riviel de Joibe Grasse tacât a Udin ai 27 di Fevrâr dal 1511. No si fevele dome de plui impuartante insurezion popolar furlane, ma ancje de plui grande che si vedi vude vie pe Rinassince intes tieris che vuê a son dentri dal stât talian. Cun di plui si trate de prime des gruessis rivoltis popolârs che a scjassin la Europe centrâl intal secul XVI, cuasi une sorte di anticipazion des dinamichis storichis europeanis di che ete. Chel istès, la storie di chest riviel e va dilunc a jessi pôc cognossude fintremai in Friûl e, in plui di cualchi câs, si le cjate strupiade di leturis superficiâls o stereotipadis. L'inovâl dai cinccent agns al devente duncje une ocasion pardabon uniche par slargjâ la cognossince di chest episodi impuartant de storie furlane.”

La Associazion 1511

La Associazion 1511 e je nassude par ricuardâ i cinccent agns dal riviel de Joibe Grasse e par svilupâ percors par slargjâ la cognossince di chest e di altris episodis di ribelisim capitâts in Friùl vie pai secui. No si trate dome di imbastî ocasions par cognossi miôr la storie furlane, fur dai stereotips che dispès le àn segnade, ma ancje di tirânt fûr struments di analisi utii pe situazion culturâl, sociâl e economiche de nestre tiere in dì di vuê. Cence dismenteâ che il svilup di trois de memorie su chescj argoments al pues judâ a valorizâ il Friûl no dome di un pont di viste culturâl, ma ancje turistic.


2 commenti:

  1. Compliments a Christan Romanini, Diretôr responsabil de riviste TIERE FURLANE. Une riviste une vore biele, ben fate e tant interessante. E compliments ancje a Carli Pup, pal so biel articul, che al merete une vore jessi let. La riviste la cjatais ancje intes bibliotechis dal Friûl.

    RispondiElimina
  2. Mandi
    grazie pai compliments ma al è plui just fâju a dute la redazion, in particolâr a Enos Costantini, vere colone de riviste, e a ducj chei che nus dan une man scrivint.
    Mandi e buine leture!
    I prins numars ju cjatais ancje in pdf su www.regione.fvg.it/tierefurlane

    RispondiElimina