ravasclêt - domenia 22 - 30^edizion da Fiesta tas corts - savôrs di una vôlta

Ravasclêt al propon, domenia 22, la 30^ edizion da Fiesta tas Corts - Savôrs di una vôlta, la mâri di dutes las manifestazion gastronomiches da nestra Regjon. Nassuda tal 1981, in ocasion da  settecentesim dal toponim "Rovuscleti", como sornada da gastronomia locâl,  à avût subit un grant sucess, tant che la sô fama in pôs agns a si è  slargjada fint al Comeli e al Cadore, e a duta la part orientâl das  provinces di Trevîs e di Vignêsia. Las protagonistes di chesta rassegna gastronomica,  a son in particolâr las femmines, ch'a proponin plats di una scuisiteça imparegjabil. Purtrop, in ducj chescj agns un grum dui lôr a son lades in  chel atri mont e tantes a son invecjades. Propit par riguardâ duta che int che cu la sô fantasia, cu la sô capacitât  à savût fa conosci e aprezâ la cusina cjargnela, a è stada alestida una mostra fotografica retrospetiva, dulà che Ulderica Da Pozzo, cui siei  "scats" luncs 30 agns, a fas rivivi l'atmosfera, i ricuarz, las imagjnes  di una fiesta che plui biela no podares jessi. I vin det ch'a è stada la  mâri di dut ce ch'al è vignût devour, tancj a àn tentât di copiâla, ma  pôs a son rivâts. Cussì i "monajoz", una volta tant, a si sintin i parons  dal bon mangjâ, e dutes chês femenutes, una vôlta a l'an a si sintin al  centro da l'atenzion, cocolades com ch'a no ur è mai capitât ta lôr vita. Palcosenic da manifestazions, cussi como il prin an, a sarà la borgada di  Stalis, cualcudun a la clama la "citât dal Vatican, par via che propit a  Stalis a è la Glêsia Parochiâl a la canonica. Se il timp al sarà galantom,  a si projôt una marea di int, chê marea che a vôltes a à fat encja un tic  di poura, par via che a si dubitava di rivâ a contentâ ducj. Par cualchi  an, propit par evitâ ch'a rîvi dongja massa int, a si è avitât di fâ  cualsiasi publicitât, chei ch'a conossin la fiesta a san ch'a cola simpri  la cjerça domenia di avost, se chê no cola il dì da Madona, e senò la  domenia dopo il cuindis. No sierv nencja spando peravols par descrivi i "plats" ch'a  vegnaran servîts, ducj ju conossin e chei ch'a ju conossin ai projôt a  informâ encja i lôr amîs. Tita De Stalis