venerdì 21 febbraio 2014

"BABEL BLU" LA IDENTITÂT E JE TAL AIAR



"Babel Blu",
la identitât e je tal aiar
 
 
Ai 24 di Fevrâr a Cjarlins une cerce in anteprime dal lavôr di Renato Rinaldi

Il progjet, menzon speciâl al 'Premio Solinas 2011', al conte il Friûl di vuê daûr de sô bandiere.

Te serade la proiezion di tocs des videointervistis e un confront tra l'autôr e Lorenzo Fabbro (ARLeF)

Lunis ai 24 di Fevrâr a Cjarlins e je une anteprime assolude. A tacâ di vot e mieze sot sere li dal centri sociâl de Latarie Turnarie e sarà la pussibilitât di viodi pe prime volte une cerce dal progjet 'Babel Blu' dal regjist Renato Rinaldi, che doi agns indaûr al à vût la menzon speciâl dal ‘Premio Solinas Documentario per
il Cinema’

A vignaran mostrâts tocs des videointervistis fatis dal autôr e in zonte de proiezion si fasarà un dibatiment viert in cont dai argoments frontâts in chel che al è un documentari dedicât ae diviersis manieris di viodi e di vivi la identitât furlane. La discussion e vignarà vierte di un confront jenfri l'autôr e il president de ARLeF

(Agjenzie Regjonâl pe Lenghe Furlane), Lorenzo Fabbro.

'Babel Blu' al conte il Friûl di vuê e la identitât furlane a tacâ di une riflession dal innomenât sociolic e filosof di divignince polache Zygmunt Bauman – «la identitât e je tal aiar» – e dal fat che ator dal Friûl si cjatin simpri plui bandieris blu cu la acuile zale, esponudis in puescj publics e privâts.

La bandiere dal Friûl si cjate in situazions une vore diferentis: tai zardins des cjasis, tes fabrichis, in ambients publics, fûr dai barcons o dai teracins, in ocasion di events istituzionâi e in contescj plui o mancul alternatîfs, dai concierts rock aes fiestis di place, des messis ai raduns dai motârs. La acuile dal patriarcje Beltram e je un simbul che salacor al cjape sù ancje altris formis, dal adesîf tacât suntune machine ae marcje di une dite di traspuarts e fintrermai al tatuaç.

'Babel Blu' al tire dongje lis testemoneancis di tancj di lôr che a àn metût fûr la bandiere. L'intindiment di Rinaldi al è chel di cirî di capî lis diviersis motivazions e i diviers significâts che a stan daûr di un simbul che al palese une identitât comune e tantis declinazions diferentis, tra afermazions positivis, rivendicazions, passions, delusions e contradizions. Une riflession su la contemporaneitât fate cun mieçs e cun ategjaments inovatîfs.

L'incuintri di lunis ai 24 di Fevrâr al è inmaneât de bande dal Comun di Cjarlins, inte suaze des ativitâts metudis adun dal Sportel intercomunâl pe lenghe furlane di Cjarlins e Muçane, cu la colaborazion de Clape culturâl di Cjarlins e Sarvâs e di Informazione Friulana e Radio Onde Furlane.

 
La partecipazion ae serade
e je libare e gratuite.
 
----------
 
Comunicât
di
 RADIO ONDE FURLANE  


Nessun commento:

Posta un commento