mercoledì 25 luglio 2012

Il Comitât pe autonomie e rilanç dal Friûl, ingropât, al salude il Cjarissim Arnalt



Il Comitât pe Autonomie
e il rilanç dal Friûl,

“ingropât”

al salude il Cjarissim Arnalt




Cjarissim Arnalt,

Cuntune vore di marum tal cûr, nô amîs dal Comitât pe Autonomie e il rilanç dal Friûl, il to Comitât, o sin culì cunvignûts par dimostrâti il nestri ingropât salût e par diti un gracie sintût , sincîr e profont, pal tô impegn simpri salt e mai strac di lavorâ pal Friûl.

La tô vite, e je simpri stade dal dut dedicade ae comunitât tai diviers nivei di impegn public che a van, come une volte si usave, dal Consei Comunâl al Parlament, passant pe Regjon.

O ricuardin la tô azion pe ricostruzion post-taramot, il to agjî, adun a ducj i nestris parlamentârs, che in chê ete a savevin fâ scuare  cence pierdi la lôr identitât politiche, par otignî i fonts dal Stât e par dâ vite a chel virtuôs e maraveôs model di ricostruzion da ducj judicât positîf.

O ricuardin il to impegn, a fin che la ricostruzion no fos dome fisiche ma ancje ocasion di svilup.

O ricuardin il to supuart ae istituzion de Universitât dal Friûl, volude dal popul in mût ustinât, e che tu tu âs volût che nassès cuntune precise finalitât leade ae realtât furlane.

O ricuardin lis tôs iniziativis parlamentârs che daspò, concludût il to mandât a son ladis a finî te leç su lis areis di confin e te leç dal ricognossiment de lenghe furlane tant che lenghe minoritarie storiche.

Tornât tant par dîle cussì, ae vite normâl, no tu ti sês mai metût a polsâ, parcè che il ripôs nol jere di sigûr une tô carateristiche. Tu âs cjapât chel to impegn autonomist che al jere simpri dentri dite e che intun ciert moment ti à puartât, come che tu stes tu lu ricuardavis, a risolvi il vincul associatîf partitic.

Al jere il 8 di novembar dal 2005 cuant che, a front des dificoltâts de politiche nazionâl e regjonâl, cun te tant che animadôr, o vin burît fûr un apel pe autonomie e il rilanç dal Friûl.

Un an dopo o vin tignût tal salon dal cjistiel di Udin, une vore cjariât di storie, la Assemblee Costituent dal Comitât e tu tu sês stât simpri "magna pars".
O ài ancjemò denant a voi la imagjin di te che tu presentavis la soluzion finâl dai lavôrs, daspò aprovade par aclamazion, come che o ài ancjemò limpide la inmagjin dal abraç fra te e il President Napoletano in ocasion de sô penultime visite a Udin.

Dentri al Comitât tu âs dât verementri tant, cu lis tôs intuizions, cul to agjì, cu la tô capacitât di vuidâ, cul to jessi in relazion cu lis realtâts plui diferentis, cui tiei scrits.
Simpri lucit te analisis e te propueste, simpri presint a lis riunions e simpri puntuâl, anzit simpri prime. No tu sês mancjât nancje tal prin periodi de malatie, ancje se chest ti costave une vore di fadie.

Tu rivavis cuntun piçul biliet che al ti servive di olme par chel che tu vevis di dî e fâ.
No tu detavis il verp.  Tu proponevis lis cuestions che tu tignivis impuartantis.  Tu savevis, daspò scoltâ les opinions di ducj a dal confront al saltave fûr la linie che si lave daûr.

Tu âs simpri desiderât, e nô cun te, il dialic cu lis categoriis economichis, cu lis fuarcis sociâls, cul mont dal Associazionisim cun lis istituzions. Dut chest si è realizât.

Tu vevis un ricuart particolâr pe Glesie furlane.

O mi inpensi che i nestris incuintris cui Vescui de nestre diocesi, a colp tu disevis che no tu jeris un crodint ma che tu ricognossevis ae Glesie il merit di batisi pes grandis causis dal Friûl e no tu mancjavis di sburtâ l'ûs de nestre lenghe tes funzions religjosis.

Cuant che la cause dal Friûl lu domandave no tu vevis pôre dai ostacui. Tu frontavis dut e ducj. Tu jeris determinât.

Pal Friûl, tu disevis, chest e altri parcè che tu, o zonti jo, dal Friûl tu jeris inamorât e dal Friûl tu ses stât un protagonist apassionât in dutis lis batiis che, piçulis o grandis, tu âs ducj i dîs vivûts cul cûr.

La tô zornade e jere lungje e començave cu lis telefonadis di matine buinore.

Al è merit to, de tô ripetude  insistence in sede parlamentâr, se finalmentri, daspò, tante spiete, e à vût lûc la sperimentazion, cumò sierade, de trasmissions RAI in lenghe furlane.

La lenghe. Come element principâl di identitât, ti à simpri viodût a so sostegn ancje in sede regjonâl cuant che je stade fate buine la leç di valorizazion e di tutele che a spiete ancjemò une concrete aplicazion.

Tu âs simpri racomandât la concretece cun rivuart ai problemis frontâts. E chest al è rivât te numerose ativitât puartade indenant che va de Universitât ae organizazion dal teritori ae economie.

Une cuestion che ti à simpri preocupât e je chê istituzionâl. Bisugnave difindi e valorizâ la specialitât de Regjon che, tu disevis, al cjate fondament vuê ancje te pacifiche coesistence di ben trê minorancis.

Pe sistemazion de Regjon, tu zontavis, al è rivât il moment dal trasferiment des funzions aministrativis  al sisteme de autonomie .

Arnalt al crodeve intun gnûf autonomisim o, miôr ancjemò, intun autonomisim moderni che nol ponte a spacaduris dal teritori, ma al autoguvier dai teritoris in clâf aministrative, valorizant cussì le "specificitât " locâls che a son une ricjece, e no un intop al svilup.

Cuant che daspò tu ti sês batût, in mieç a dificoltâts e prejudizis, pe la costituzion de Assemblee des Provinciis Furlanis che tu tu viodevis cuâl organisim par frontâ i problemis interprovinciâi.

Tu âs simpri volût un Friûl fuart te sô identitât e mai sierât in se stes.

A ti, cussì ancje a nô, ogni tant si sintive un tic di amarece pe pocje atenzion dal moviment politic sui cantins dal autonomisim.

Ma daspò tu concludevis disint: bisugne là indenant istès. Tu sintivis l'impegn come une mission.

Nô, Arnalt, ti vin considerât simpri, come une persone impegnade te vite publiche.

Ma tu, no tu jeris dome chest.

Tu tu as vût simpri une grande sensibilitât pe tô famee : la femine che cui fîs ti è stade simpri dongje in particolâr tal timp de malatie. O ricuardi la tô preocupazion par jê cuant che no stave tant ben, e tu tu fremevis par la sô salût.

Ae famee o disin graciis par vêlu liberât di ogni compit in mût di consentîti un impegn politic cussì alt.

Ae famee o esprimin i sens dal plui profont corot da ducj i amîs dal Comitât e di ducj chei che a àn operât e colaborât.

A ti Arnalt, cun grande amicizie e stime, o disin, dal profont dal cûr il nestri "mandi".


MANDI grant autonomist furlan.


Comitât pe Autonomie e
il rilanç dal Friûl, il to Comitât

Roberto Dominici

----------------


dal sît internet del setemanâl

LA VITA CATTOLICA



Nessun commento:

Posta un commento