F R I ÛL
PROBLEMIS DI RISOLVI
PAR VÊ ALTERNATIVIS
AL MÂL E AL MARAN
“ Pe rapresentazion e pe rapresentance dal Friûl al è cetant ce fâ, ma al covente fat.
Il pericul, almancul par ce che al tocje la rapresentance, al è grues: chel di scugnî sielzi dome tra il mâl e il Maran.”
-----------
La Vierte des sisilis e lis cuatri stagjons di dordui e cocâi
........................................................... ..........
EUROFURLAN
A son doi i problemis di fonde dal Friûl: chel de rapresentazion e chel de rapresentance.
Ducj i doi si son palesâts a clâr in ocasion de visite plui resinte dal president Napolitano, cemût che o vin ricuardât. Chest al jere saltât fûr in particolâr a Glemone, là che di ce che si viodeve culì e soredut di ce che a àn mostrât lis televisions nol someave nancje di jessi in Friûl ma inaltrò, in Italie, forsit intune fantomatiche Gèmona (cul acent sul “e”, cemût che e à dit plui voltis une gjornaliste de Rai).
Ad in plen coerent cun chê rapresentazion falade e alienade, fie di un inçussament secolâr a colps di “triveneto”, “piccola patria”, frecis e plumis, al è stât il compuartament dai rapresentants di cheste tiere e di cheste int, che a àn mostrât di no savê, o di vê pôre di savê e di palesâ, che la nestre – il Friûl cun Triest – e je une regjon dal Stât talian, ma no je dome taliane: e je ancje furlane, slovene e gjermaniche.
In cheste suaze, cemût che o vin scrit, chel dal sindic di Faedis, cul sô salût par furlan e par sloven, al è stât un gjest cussì normâl e sempliç e propit par chest ecezionâl e salacor eroic. Un segnâl che al fâs pensâ ben pal avignî, stant che al mostre la possibilitât che e sedi une rapresentance divierse, plui vere, dal nestri teritori, de sô int, des sôs dibisugnis e dai siei dirits.
Se si cjalisi ator, però, al reste un fat par so cont, che al podarès ancje vignî calcolât compagn di chê sisile solitarie che – si dîs par talian – «non fa primavera».
In cheste situazion, a meretin preseadis lis cjoltis di posizion, de bande di cualchi conseîr regjonâl, in cont dal eletrodot Redipuie- Udin Sud, che à an dit che se si à di fâlu al à di jessi fat dome sot tiere. Sul argoment si è esprimût compagn ancje il gnûf segretari de Lega Nord di chenti, che al mostre di capî che al covente plui Friûl e mancul “Padania”, ma che nol pues lâ plui inlà di cussì.
Ancje in chescj câs, cun dut che si ciri di jessi otimiscj, almancul par cumò o restin tal cjamp des sisilis solitariis.
E cussì a son altris i uciei che a svualin tal nestri cîl e che a fasin dams cun peraulis, oparis e omissions: dordui, cocâi, stornei e pampagai di ducj i colôrs.
Il miôr di ducj al è chel che al dîs che al fâs dut lui e che nol combine nuie, de lenghe furlane in Rai, che par cjatâle no si pues nancje domandâi a “Chi l'ha visto?”, fintremai al “Messâl furlan”, cuistion che forsit e cjatarà une soluzion, ma propit parcè che no je di sô competence.
Fenomenâl ancje chel altri, che juste chê altre dî al domandâve di «certificare la friulanità dei professori»: in confront cun chê, la propueste eventuâl di fâur l'antidoping a cierts di lôr prin che a vierzin il bec o che a scrivin su Facebook e somee pardabon plene di sintiment.
Pe rapresentazion e pe rapresentance dal Friûl al è cetant ce fâ, ma al covente fat.
Il pericul, almancul par ce che al tocje la rapresentance, al è grues: chel di scugnî sielzi dome tra il mâl e il Maran.
LA VIGNETTA DELLA SETTIMANA
Euro Furlan
da IL QUOTIDIANO (FVG)
ANNO II N° 147 VENERDI 6 LUGLIO 2012
LETTORI
Nessun commento:
Posta un commento