TAL NON DI FAUSTO SCHIAVI di Adrian CESCJE

Pontebe, ai 13 di Otubar 2012

Fausto Schiavi

di Pontebe

A Pontebe il 13 di Otubar 2012, la Aministrazion comunâl e à viert un piçul zardin pai fruts dedicât a Fausto Schiavi.

E à scuvierte une targhe cul so profîl dissegnât di Luciano Ceschia e une scrite bilenghe.

Ta sale comunâl Adrian Cescje al à tignût il discors di comemorazion politiche, po Fontanin e Violin.

In ricuart di Fausto Schiavi o publichìn il discors di comemorazion politiche di Adrian Cescje, che o ringrazìn.  

La Redazion del blog

-------------

Tal non

di Fausto Schiavi

di Pontebe

di Adrian Cescje

Pontebe, ai 13 di Otubar 2012.

Di chel program di riscat sociâl e culturâl che al veve di gjavâ il Friûl de sô cundizion di miserie secolâr une buine part e je stade realizade; no dut, une part. La emigrazion che tant al veve scombatût Fausto Schiavi cuintri di jê, se no nus mene plui vie i zovins in paîs lontans, di là des Alps o dal mâr, dut câs e à mudade la sô muse, e i paîs des nestris montagnis cumò a son fats di cjasis vueidis e silenziosis, cui scûrs e lis puartis sieradis cuasi dut il timp dal an: la gnove emigrazion.

La Universitât dal Friûl che e veve di permeti ai nestris zovins di studiâ e di formâ la classe professionâl e dirigjente di cheste tiere le vin otignude, ma nol sarà scjampât a nissun di voaltris che, in plui di une ocasion, tai ultins timps, lis stessis autoritâts academichis le àn butade li che si varès cumò in timps di criùre economiche di unîle cun chê altre de Regjon che ai timps di Schiavi e à fat di dut par che no nassès autonome; di chel sium di autonomie istituzionâl dal Friûl che al fo di Fausto Schiavi, di pre Checo Placerean e di tancj altris che a vignirin prin e a son vignûts daspò, che al varès vût di declinâsi intune Europe unide tal rispiet des diferencis dai siei popui, si è realizât pôc, che, anzit, vuê si sint fevelâ intor di ridusi o di scancelâ la nestre specialitât, e fintremai la semplice autonomie, a cause des distorsions de politiche di altris regjons che a son stadis aministradis te coruzion, fasint di ogni jerbe un fas.

Propit par chestis resons, lis ideis dai vielis autonomiscj, lis ideis di une autonomie che e voleve sei tant fuarte che oneste e pulide di Fausto Schiavi no puedin sei dismenteadis, no puedin sei lassadis colâ e ogni iniziative che puarte ae memorie chês personis che lis àn insegnadis e sostignudis e va laudade. A vin ancjemò bisugne di chês ideis e di chei esemplis, par trasmetilis ai nestris zovins.

Te mê memorie e te memorie di ducj chei che lu àn cognossût intal moviment politic autonomist che al jere nassût tal 1966, il Moviment Friûl, Fausto Schiavi al à lassade une olme che no si è mai sfantade e, fin che al sarà vîf cualchidun di noaltris, no si sfantarà mai.

Inalore, se o sin achì, che si istituìs tal sô paîs une zardin pai fruts che ju judi a cressi ancje tal so ricuart, come che o sin stâts daspò de sô discomparide tal 1972 fin a vuê, che a son passâts 40 agns, e o sarìn ancjemò tes placis e tes istituzions dal Friûl, al è parcè che o volìn che lis sôs ideis no si distudin, o volìn che lis cjapin sù lis gjenerazions gnovis, fin che il Friûl al sarà liberât de sô inferioritât storiche e al varà la sô autonomie plene.

Se une dì, un di chei fruts che a vignaran a zuiâ ta chest zardin al leiarà su la tabele in dôs lenghis il so non e al domandarà a so pari o a sô mari cui che al jere Fausto Schiavi, al è nestri desideri e nestri intindiment che so pari e sô mari i disin no dome che al jere un inzegnîr di Pontebe, ma un om che al amave la sô tiere furlane, la Patrie dal Friûl, chê che e va de Livence al Timâf, che le voleve liberade de sôs dificoltâts storichis, de miserie, de sotanance e de sindrome di sotanance, che le à tal sanc, inte responsabilitât de sô autonomie, che al à lotât par che il Friûl al vedi chê Universitât li che al studiarà co al sarà cressût avonde, che cence di lui e dal Moviment no sarès mai stade istituide.

O volìn che i fruts di Pontebe a sepin chestis robis e che la tabele cul so non e il so profîl ur es ricuardi simpri.

Il non di Fausto al è ancjemò vîf intor pal Friûl, cun dut che la sô azion politiche tal Moviment e je durade sì e no cinc agns. E je vive tal cûr dai autonomiscj, e lu ricuardin ancje personis e politics che no son passâts pal partît autonomist. Tant vive che a voltis e risulte deformade de mitizazion entusiasistiche. Jo o dîs che nol covente mitizâ la sô figure par fâle risaltâ: baste dî cuale che e je stade la sô opare, cuâl che al è stât l‟aspiet specific de sô opare.

Tal 1966 al nasseve il Moviment Friûl intun studi di nodâr a Udin, daûr des manifestazions straordenariis di place di miars di students a Udin par reclamâ la facoltât di Medisine e la Universitât Furlane, 1965, 1966, 1967. Intor di chel moviment li e jere madressude la convinzion che e coventàs une organizazion politiche par reclamâ dongje de Universitât ancje il dirit di lavorâ dai Furlans a cjase lôr, cence che a vessin di emigrâ, che la Regjon e il Stât a proviodessin a gjavâ la tiere furlane de miserie secolâr, dal isolament, che i gjavassin lis sclavitûts militars che no lassavin libar il teritori di cjatâ la strade dal so svilup, che i Furlans a fossin parons des lôr sieltis autonomis cence scugnî sopuartâ la interference politiche di une tiere cun altris problemis grâfs e impuartants, ma di altre nature, Triest, che te unitât regjonâl cu la sô abile classe politiche e tindeve a prevaricâ la classe politiche furlane, plui modeste e di mentalitât sotane.

Fausto si svicinà a chest moviment politic un an plui tart, tal 1967, i plasè, si iscrivè e al dimostrà daurman clarece di ideis sei intal messaç politic sul esterni, sei te organizazion interne.

Il Moviment dal inizi al veve plui animis ideologjichis, e ognidun al veve il so plan di azion, o al crodeve di vêlu. Fausto al capì che in chê forme e cun chel aparât di confusion il partît nol sarès lât a dilunc, cun dute la reson e la justece che al podeve vê il so program ideâl. Fausto al dimostrà tante clarece di pinsîr e tante determinazion che intor di lui si formà un grup di personis che lu stimavin e lu poiavin, e a cjatarin daurman la sintonie sot de sô vuide par organizâ il moviment intune struture di partît che al varès vût di frontâ une lote dure e lungje intal timp.

L'inzegnîr di Pontebe al realizà une grande opare di inzegnerie politiche, il partît autonomist dal Friûl. Fausto al lotà pal lavôr dai Furlans, cuintri de emigrazion, pe Universitât furlane, pe Regjon Friûl separade di Triest, che e varès vût di vê la sô autonomie, une altre autonomie.

Ma Fausto nol à vût plui merit di cualsisei altri militant dal Moviment Friûl dai siei timps intal volê il riscat storic dal Friûl, e di chei che a continuarin par altris vincj agns daspò de sô muart a batisi pe stesse cause. Al à vût chei merits, e 'ndi à vût un altri specific, dut so.

Fausto al à vût in primis il coraç e il merit di pensâ che cence une fuarce autonomiste dome furlane, organizade, che si presentàs aes elezions, che e ves un so eletorât, che e menaçàs chês altris fuarcis politichis di gjavâur consens se no vessin scomençât a cjalâ il Friûl te otiche de autonomie e no dai sotans, il program dal Moviment no si sarès realizât, e in Friûl si sarès invidrignide chê rassegnazion che lui al clamave 'la sconfite storiche dal Friûl'. "Noaltris, al disè intune place di Tresesin ae conclusion de campagne eletorâl aministrative dal 1970, o vin la cussience storiche di vê fermade la sconfite dal Friûl”. Chest al fo il merit specific di Fausto, dongje di chei altris, di vê pensât a une fuarce autonomiste dome furlane, che si presentàs al eletorât, che si definìs un eletorat autonomist, e di vê realizât chest pinsîr.

Al menà il Moviment Friûl aes elezions regjonâls dal 1968, al realizà trê conseîrs regjonâi, un sucès straordenari pe situazion di chei agns, cuant che e dominave sul teritori, cumò lu savìn, la rêt invisibile di Gladio, al trasferì dute la sô passion e viamence politiche dentri di chê istituzion, cubiant la bataie istituzionâl cuntune presince continue in dutis lis placis dal Friûl. E al fo tant grant chest merit che, se ancje la muart nus al veve puartât vie tant adore, tal 1972, la sô opare, il so partît, chel che lui al veve struturât e inviât par durâ a dilunc intai agns, al è durât atîf fint tal 1992, e in gracie des sôs bataiis e de sô opare al à realizât bocons impuartants dal so program, scomençant de Universitât dal Friûl.

Lis sôs bataiis intal consei regjonâl e fûr dal consei, la sô denunzie continue des responsabilitâts politichis di vê lassât e di continuâ a lassâ il Friûl in cundizion di depression economiche e culturâl, si son associadis a chês altris vôs dal Moviment, in primis a chê di pre Checo Placerean, il predi di Montenars che al veve sielzude ancje lui la strade de politiche, dongje di chê de preiere di une Glesie furlane, parcè che, al diseve, in cierts moments de storie e de vite bisugne sielzi e 'no si à di vê pôre di vê coraç'.

Placerean e Schiavi a son deventâts te memorie dai autonomiscj lis dôs iconis plui grandis de sperance, de determinazion politiche di vinci la sindrome di sotanance, dal furlan che si riscate.

Te omelie de sô messe di funerâl, chi, a Pontebe (mal visi come se al fos vuê, ancje se a son passâts 40 agns), pre Checo Placerean al disè di Fausto: “... un al è cristian cuant che al vûl ben al prossin. Però il volê ben al prossin al subìs un pôc l'inflùs dal nestri temperament. Ognidun di nô al vûl ben al prossin un pôc cul so temperament, cul so mût di jessi, cul so mût di sintî. Ore, o crôt di scugnî indicâ tal nestri fradi inte fede Fausto un om che al à dât un esempli di amôr dal prossin parcè che al à amât il nestri puar popul, tune maniere plene di oparis e ancje, là chel al coventave, di peraulis”.

Se la intuizion di Fausto e je stade chê che al Friûl i coventave un partît autonomist par realizâ une politiche di autonomie, par pleâ ancje chês altris fuarcis politichis viers un program di autonomie furlane, e je ancje vere che la costruzion di chel partît nol rivà a realizâle ad in plen come che lui al voleve, in vite, al cjatà oposizions e incomprensions dentri de stesse scuadre dai siei colaboradôrs plui dongje, che no lu capivin fin insom e che di un partît autonomist identitari o 'etnic', come che lui si esprimeve, a ûs la Südtiroler Volkspartei o la Union Valdotaine, no voleve savêndi.

Fausto al viodeve plui lontan di chei altris, e al anticipave chê forme di partît e chês bataiis pe identitât e pe lenghe che une gnove gjenerazion di autonomiscj e varès davueltis dopo de sô muart.

Vuê o vin une leç dal stât e une leç regjonâl pe lenghe furlane, che a son sì mâl aplicadis, o no aplicadis piç, ma che pûr simpri a son alc, a confront dal nuie di chei agns. Se vuê o vin plui fuarce e orgoi di fevelâ la nestre lenghe, di pretindile tes istituzions e a scuele, in aplicazions di chês leçs, chest al è par merit di chês nestris lotis e ancje di chês intuizions di Fausto che tal 1968, cuant che lis veve formuladis, no jeris stadis capidis nancje de prime gjenerazion di autonomiscj dal so partît, ma che tai agns 70, 80 e 90 a son deventadis motôr de sô anime.

Fresc di elezion al consei regjonâl, al scrivè un saç articolât, complès e avonde lunc, su la cuistion autonomiste identitarie, che lu ai cjatât tal archivi storic dal Moviment. Un saç che al mertarès ancjemò di sei fat cognossi e di sei publicât. Lu veve ispirât la leture di un libri di un studiôs francês, Guy Héraud, Popoli e lingue d'Europa, jessût in traduzion che al jere pôc. Lu proponè ae discussion ristrete dai siei colaboradôrs ai 17 di Setembar dal 1968, par che 'ndi gjavassin un program di azion pal Moviment.

Al scriveve:

 

“Nonostante l'intensa campagna condotta contro il Friulano negli ultimi cent'anni, e particolarmente negli ultimi cinquanta, il Friulano resiste tenacemente non tanto nella città di Udine, dove più forte e più a lungo si è sentita l'influenza dei Veneti, quanto nelle campagne. Ciò nonostante bisogna anche riconoscere che esso regredisce e non solo, purtroppo, nell'uso quanto nella mentalità, specie delle classi intellettuali, che si vergognano ormai ad usarlo, e lo hanno, in pratica, declassato a dialetto. Le posizioni più salienti sono: esclusione totale e sistematica da ogni atto ufficiale; esclusione quasi al 100/100 dalla toponomastica; orientamento negativo della scuola che non solo non lo insegna ma che anzi istiga, attraverso i maestri, i genitori a non parlarlo con i figli per non pregiudicarne, si dice, il successo in “Italiano”; non esiste un Friulano Standard; la fonetica ufficiale non è uniforme; lo scrivere in friulano è a conoscenza di pochi (io stesso non sono capace di farlo) [...] Vale la pena di fare un inciso su questo problema [...] e cioè sul fenomeno del patriottismo alla rovescia che si manifesta sempre quando una etnia viene schiacciata da una più forte: le classi dirigenti delle etnie più deboli timorose di perdere i privilegi economici, politici e culturali, si atteggiano, masochisticamente, a difensori dell'etnia dominante [...]; nessuna meraviglia quindi che questo fenomeno si sia verificato anche in Friuli”.

Cumò, par merit de gjenerazion dai autonomiscj dal Moviment che e eredità tal 1972 insiemi al partît ancje lis sôs ideis, il furlan al à une grafie uniche e uficiâl, une lenghe comune stabilizade, normalizade e standard, codificade intun Grant Dizionari Bilengâl Talian Furlan di passe 60 mil vôs patrimoniâls e neologjichis tecnicosientifichis, jessût in formât eletronic, on line, e presentât ancje in 6 volums su cjarte il mês di Otubar dal 2011, leçs che lis ricognossin e leçs che lu previodin tal insegnament scolastic, al comparìs te toponomastiche e ancje, in plui di cualchi puest e di cualchi ocasion, tai messaçs istituzionâi.

Ma in chê volte lis robis a jerin tant diferentis e Fausto al restà une vore mâl dal esit di chê discussion che i dimostrave che al varès vût di lavorâ ancjemò di chel pôc tal so partît par madressi la sô visuâl politiche. Fausto al scrivè chestis peraulis, intune forme tant lucide e plene di motivazion tant che e jere mareade, a un dai compagns dal Moviment Friûl che a vevin discutût il so saç, chel dal '68, ma che i vevin dineadis lis sôs tesis cu la motivazion che il partît al veve di impegnâsi pe economie e pal lavôr, e no pe identitât etnicolinguistiche, e a vevin refudât che il partît si impegnàs in cheste direzion:

 “... la faccenda di ieri non mi va proprio giù: ritengo di aggiungere quindi un chiarimento sulla supposta contrapposizione etnia-sviluppo economico di cui avete tanto parlato.

Personalmente ritengo che il Friuli non si solleverà mai, nemmeno economicamente, se non realizza la propria difesa come gruppo distinto; la difesa etnica è coordinare dello sviluppo: questo è il senso della regione “Friuli”. Quand'anche non fosse così, tuttavia io ritengo più importante ridare la dignità di se stessi alle nostre popolazioni ed orgoglio del proprio 'limitato' valore che assicurare loro un po' più di pane condito di inferiorità e ingiustizia. Preferisco un Friuli un po' più povero ma che si batte con dignità e coscienza per i suoi figli presenti ed esiliati ad una amorfa popolazione lieta della pancia piena e della propria distruzione. Fra 20 anni avremo senz'altro molti più automobili e infiniti televisori così come oggi abbiamo molto più pane di 20 anni fa; la tecnica sconfiggerà comunque il bisogno: il problema è quindi se fra 20 anni ci sarà ancora un Friuli che non sia una mera espressione geografica. Questa è la vostra responsabilità; per questo, alla lunga, saremo giudicati. Fausto”.


Di malât che al jere, un pâr di mês prin di lassânus par simpri, al mandà un messaç ai siei compagns di partît che a jerin riunîts a congrès, che al concludeve in cheste maniere: “O ai finît. O speri di podê tornâ prest a scombati par chestis ideis insiemi cun voaltris. Se chest no mi fos pussibil, mi fâs auguri che altris a vuelin cjapâ sù chestis ideis e cheste bandiere che jo mi soi sfuarçât di puartâ indenant fin che lis fuarcis mal àn permetût”.
Noaltris lis vin cjapadis sù.

------------------

I colori e il grassetto sono della Redazione del Blog