mercoledì 24 luglio 2013

Graciis dai toi preziôs insegnaments. Cungjò ARNALT !


 



ARNALT BARACÊT

Vuê, al 24 di Lui, al è un an
che lu vin compagnât
tal ultin viaç.... 


Vuê, ai 24 di Lui, al è un an che o vin compagnât tal ultin viaç il nestri amì Arnalt Baracêt, un om che al à lavorât par agnorums pal so e nestri Friûl: lis batais pe lenghe e pe Universitât che, in gracie di un so emendament, al è rivât a otignî te leç dal taramot.

Simpri in prime linie su ducj i progjets che a rivuadavin il Friûl. Cu la sô grinte nol molave mai, fevelant cun ducj chei che a mostravin di lavorâ pal Friûl cence viodi di ce colôr politic che a jerin.

Cheste e je stade la lezion che Arnalt nus à lassât e che come Comitât pe Autonomie e il Rilanç dal Friûl o cirìn di puartâ indenant.


Graciis dai tiei
preziôs insegnaments.

Cungjò ARNALT!

2 commenti:

  1. Cussì Christian Romanini sul so Blog:

    "Al è passât un an di cuant che al è tornât te “cjase dal Pari”. Arnalt Baracêt al è mancjât ai 21 di Lui dal 2012: un politic che si è spindût pal Friûl. Par ricuardâlu, us segnali l’intervent di Dree Venier su la Patrie dal an passât e la sô ultime interviste che i veve fat Oscar Puntel.
    E mi imagjini la sodisfazion di Arnalt se al ves vude pes mans la sentence 215 de Cort Costituzionâl…"

    http://romanini-udine.blogautore.repubblica.it/2013/07/21/ricuardant-arnalt-baracet/

    RispondiElimina
  2. E dal sît de Regjon – GNOVIS

    22.07.13
    IN MEMORIE DAL ON. ARNALDO BARACETTI

    Udin, ai 22 di Lui dal 2013 – La resinte sentence de Cort Costituzionâl intervignude su la spending review – ritignude discriminatorie tai confronts de minorance linguistiche furlane – e ufrìs la ocasion par ricuardâ l’on. Arnaldo Baracetti a un an de sô muart (al è mancjât ai 21 di Lui dal 2012). Di fat fondamentâl al fo il lavôr dal on. Baracetti che si batè pe aprovazion de leç pe valorizazion de lenghe furlane. Al fo deputât dal Partît comunist talian dal 1976 al 1987. Dopo dal taramot dal 1976 al fo stabilît par leç, in gracie di un so emendament, che la Universitât dal Friûl e ves tant che «obietîf di contribuî al progrès civîl, sociâl e a la rinassite economiche dal Friûl e di deventâ organic strument di disvilup e di rinovament dai filons origjinâi de culture, de lenghe, des tradizions e de storie dal Friûl». Tal 1978 al presentà la propueste di leç “Normis pe valorizazion de lenghe e de culture furlane”, un at che il parlament al concretizà dopo passe 20 agns, cuant che e fo aprovade la leç 482/1999. “Il so impegn e la sô costance a àn dât un contribût preziôs a servizi dal Friûl e de lenghe furlane e par chest al è un at dovût ricuardâ l’on. Baracetti” al à comentât Lorenzo Zanon, president de Agjenzie regjonâl pe lenghe furlane. “Fondamentâl e je stade ancje la sô ativitât simpri salde par domandâ i programs in lenghe furlane te RAI e par garantî l’insegnament de marilenghe tes scuelis. Ce che al è stât otignût al è un coronament dal so grant lavôr”. ARC

    http://www.regione.fvg.it/rafvg/comunicati/multilingua.act?dir=/rafvg/cms/RAFVG/notiziedallagiunta/furlan/

    RispondiElimina