di
William Cisilino
L’atac a lis autonomiis regjonâls e a lis lenghis minoritariis al à a ce fâ pôc e nuie cu la “spending review”. Daûr (o devant) al è alc altri.
E je cheste la idee che mi soi fate tai ultins timps leint fra lis pleis de struture (provediments dal Guvier) e sovrastruture (media) di cheste fase storiche de classe dirigjente taliane.
Di fat, se il probleme al fos dome economic-contabil, no si capirès, par esempli, parcè che regjons e autonomiis locâls che a àn vût une gjestion di belanç fate simpri cun sintiment a varessin di patî il stes ridimensionament di ents za deficitaris di almancul 30 agns.
E no si capirès nancje parcè che i unics fonts che il Stât al à metût – dopo ciancuante agns – par lis propriis lenghis e culturis autoctonis a son za stâts no dîs dimiezâts, ma fintremai decimâts. E chest, par altri, su cuatri carantans, intal mâr grant e discognossût dal belanç dal Stât.
La realtât e je che la classe dirigjente taliane e je daûr a mangjâ pan pintût. E je daûr a rispolverâ, par esempli, chei slogans politics e chei titui di gjornâl dal dopo vuere che a àn ritardât la nestre autonomie speciâl par 15 agns (e chê des Regjons ordenariis di 25) rispiet ae Costituzion. E je daûr a considerâ lis lenghis “altris” presintis intal Paîs “malerba da sradicare”, come subit daspò dal 1861. In sumis, e je daûr, cu la scuse de crisi, a presentâ dutis lis piês debolecis di un Stât che al rinuncie a cjalâsi in muse e che al vûl sei diviers di ce che al è.
O speri di sbaliâmi.
WILLIAM CISILINO
-------------
Gjavât fûr dal BLOG di William Cisilino
Nessun commento:
Posta un commento